hujum mein tanhai

saḳht hairat hai ye kis bazm meñ baiThā huuñ maiñ

ahl-e-mahfil ko baḌe ġhaur se taktā huuñ maiñ

ek sūrat nazar aatī nahīñ dekhī-bhālī

kaun se log haiñ ye jin meñ ki tanhā huuñ maiñ

bekasī par mirī rotī hai mirī tanhā.ī

sifat-e-sham.a jab is bazm meñ jaltā huuñ maiñ

ham-zabāñ hai na koī aur na koī hamrāz

dāstāñ apnī havāoñ ko sunātā huuñ maiñ

pheñk detā huuñ fazāoñ meñ navā.eñ dil kī

apnā dam-sāz kisī ko nahīñ paatā huuñ maiñ

aah duniyā tirī vus.at meñ ye kyā hai ki koī

na to merā hai shanāsā na kisī kā huuñ maiñ

koī dil-soz nahīñ dahr meñ is dil ke sivā

aur is dil se bhī kam-baḳht bhaḌaktā huuñ maiñ

kuchh ajab haal hai āshufta-mizājī kā mirī

kabhī ro detā huuñ maiñ to kabhī hañstā huuñ maiñ

ruuh ghuTtī hai jo is tang qafas meñ merī

sifat-e-murġh-e-giraftār phaḌaktā huuñ maiñ

barq kī lahr sī hai har rag-o-pai meñ saarī

hama-tan nabz kī mānind taḌaptā huuñ maiñ

dil dhaḌaktā hai to kānoñ meñ ye aatī hai sadā

rahm ai shiddat-e-ehsās ki phaTtā huuñ maiñ

kabhī taskīñ ke liye hai gul-o-gulshan kī talāsh

kabhī vahshat meñ sū-e-dasht lapaktā huuñ maiñ

koī dekhe mirī us vaqt kī shorīda-sarī

dar-o-dīvār se jab sar ko paTaktā huuñ maiñ

dil-e-hassās bhī kyā chiiz hai allāh allāh

jab kalī koī chaTaktī hai dahaltā huuñ maiñ

saañs letā huuñ to andar se nikaltā hai dhuāñ

kaun sī aag hai ye jis meñ ki jaltā huuñ maiñ

raakh kar dī tapish-e-ishq ne saarī hastī

ek sho.ala kī tarah phir bhī lapaktā huuñ maiñ

kisī karvaT kisī pahlū nahīñ ārām mujhe

kaun sā dard hai ye jis se taḌaptā huuñ maiñ

chain aatā nahīñ ik dam bhī jo is dil ko 'jalīl'

kis ko is paap kī bastī meñ bhaTaktā huuñ maiñ

saKHt hairat hai ye kis bazm mein baiTha hun main

ahl-e-mahfil ko baDe ghaur se takta hun main

ek surat nazar aati nahin dekhi-bhaali

kaun se log hain ye jin mein ki tanha hun main

bekasi par meri roti hai meri tanhai

sifat-e-shama jab is bazm mein jalta hun main

ham-zaban hai na koi aur na koi hamraaz

dastan apni hawaon ko sunata hun main

phenk deta hun fazaon mein nawaen dil ki

apna dam-saz kisi ko nahin pata hun main

aah duniya teri wusat mein ye kya hai ki koi

na to mera hai shanasa na kisi ka hun main

koi dil-soz nahin dahr mein is dil ke siwa

aur is dil se bhi kam-baKHt bhaDakta hun main

kuchh ajab haal hai aashufta-mizaji ka meri

kabhi ro deta hun main to kabhi hansta hun main

ruh ghuTti hai jo is tang qafas mein meri

sifat-e-murgh-e-giraftar phaDakta hun main

barq ki lahr si hai har rag-o-pai mein sari

hama-tan nabz ki manind taDapta hun main

dil dhaDakta hai to kanon mein ye aati hai sada

rahm ai shiddat-e-ehsas ki phaTta hun main

kabhi taskin ke liye hai gul-o-gulshan ki talash

kabhi wahshat mein su-e-dasht lapakta hun main

koi dekhe meri us waqt ki shorida-sari

dar-o-diwar se jab sar ko paTakta hun main

dil-e-hassas bhi kya chiz hai allah allah

jab kali koi chaTakti hai dahalta hun main

sans leta hun to andar se nikalta hai dhuan

kaun si aag hai ye jis mein ki jalta hun main

rakh kar di tapish-e-ishq ne sari hasti

ek shoala ki tarah phir bhi lapakta hun main

kisi karwaT kisi pahlu nahin aaram mujhe

kaun sa dard hai ye jis se taDapta hun main

chain aata nahin ek dam bhi jo is dil ko 'jalil'

kis ko is pap ki basti mein bhaTakta hun main