husain! tumi kothae

khañDar sā shahr

ghup tārīk rātoñ meñ

husain-ibn-e-alī kī yaad meñ mātam-kunāñ

ro-ro ke kahtā hai

husain! tuumī kothā.e?

mahābt-e-jañg kī ye sarzamīñ

murshid kī ye bastī

tarastī hai sirāj-uddolā ko har-pal

masājid meñ namāzī chiḌiyāñ pābandī se aatī haiñ

shikasta haiñ bhī to īmāñ kā mehrāboñ se kyā matlab

aqīdoñ ko hai mimbar kyā

ab in vīrān tāqoñ meñ diyoñ kī kaun sochegā

chalo, lañgar uThāo

kuuch karnā hai udhar ko ab

jahāñ koī añdhere meñ yūñhī mātam-kunāñ hogā

na jaane kab gireñ lāsheñ

luTe ḳheme

uḌī chādar

na jaane kab kisī ne rakh diye hathiyār

kis ne zid meñ de dī jaañ

ye nauhe phir kisī din ke liye rakh do

ki tārīḳheñ rulātī haiñ

chalo paaT aa.eñ ḳhandaq

moḌ deñ topeñ

uThā kar pheñk deñ jins-e-tijārat gahre paanī meñ

vo sharteñ aaj manvāleñ

kabhī jin par siyāhī pher dī thī mīr-'ja.afar' ne

khanDar sa shahr

ghup tarik raaton mein

husain-ibn-e-ali ki yaad mein matam-kunan

ro-ro ke kahta hai

husain! tumi kothae?

mahabt-e-jang ki ye sarzamin

murshid ki ye basti

tarasti hai siraj-uddola ko har-pal

masajid mein namazi chiDiyan pabandi se aati hain

shikasta hain bhi to iman ka mehrabon se kya matlab

aqidon ko hai mimbar kya

ab in viran taqon mein diyon ki kaun sochega

chalo, langar uThao

kuch karna hai udhar ko ab

jahan koi andhere mein yunhi matam-kunan hoga

na jaane kab giren lashen

luTe KHeme

uDi chadar

na jaane kab kisi ne rakh diye hathiyar

kis ne zid mein de di jaan

ye nauhe phir kisi din ke liye rakh do

ki tariKHen rulati hain

chalo paT aaen KHandaq

moD den topen

uTha kar phenk den jins-e-tijarat gahre pani mein

wo sharten aaj manwalen

kabhi jin par siyahi pher di thi mir-'jafar' ne