husn-e-bimar

kyā ġhazab hai husn ke bīmār hone kī sadā

jaise kachchī niind se bedār hone kī adā

inkisār-e-husn palkoñ ke jhapakne meñ nihāñ

nīm-vā bīmār āñkhoñ se muravvat sī ayaañ

jumbish-e-mizhgāñ meñ ġhaltāñ sāz-e-ġham kā zer o bam

ḳhāmushī meñ par-fishāñ īfā-e-paimāñ kī qasam

ehtirām-e-ishq kī rau dil-nashīñ āvāz meñ

ek phīke-pan kā sannāTā dayār-e-nāz meñ

al-amāñ āñkhoñ kī nīm-afsurda sī afsūñ-garī

ek dhundlā sā tabassum ik thakī sī dilbarī

chūḌiyāñ Dhīlī dilā.ī par shikan māthe pe haat

lab pe ḳhushkī ruḳh pe sūñdhā-pan nazar meñ iltifāt

halkī halkī jhalkiyāñ ruḳhsār par yuuñ nuur kī

jaise gul par sub.h-e-kāzib kī suhānī chāñdnī

le rahā hai karvaTeñ aariz meñ yuuñ rañg-e-shabāb

jis tarah mauj-e-ḳhirāmāñ par ziyā-e-māhtāb

husn yuuñ khoyā huā sā bazm-e-mahsūsāt meñ

jaise donoñ vaqt milte huuñ bharī barsāt meñ

yuuñ hai ik raushan namī sī chashm-e-sehar-andāz meñ

sub.h ko shabnam ho jaise ma.ariz-e-parvāz meñ

jaise kohre meñ koī tābinda manzar duur kā

jaise pichhlī raat ke siine pe Dorā nuur kā

aise izmehlāl par duniyā kī barnā.ī nisār

aisī bīmārī par ejāz-e-masīhā.ī nisār

kya ghazab hai husn ke bimar hone ki sada

jaise kachchi nind se bedar hone ki ada

inkisar-e-husn palkon ke jhapakne mein nihan

nim-wa bimar aankhon se murawwat si ayan

jumbish-e-mizhgan mein ghaltan saz-e-gham ka zer o bam

KHamushi mein par-fishan ifa-e-paiman ki qasam

ehtiram-e-ishq ki rau dil-nashin aawaz mein

ek phike-pan ka sannaTa dayar-e-naz mein

al-aman aankhon ki nim-afsurda si afsun-gari

ek dhundla sa tabassum ek thaki si dilbari

chuDiyan Dhili dilai par shikan mathe pe hat

lab pe KHushki ruKH pe sundha-pan nazar mein iltifat

halki halki jhalkiyan ruKHsar par yun nur ki

jaise gul par subh-e-kazib ki suhani chandni

le raha hai karwaTen aariz mein yun rang-e-shabab

jis tarah mauj-e-KHiraman par ziya-e-mahtab

husn yun khoya hua sa bazm-e-mahsusat mein

jaise donon waqt milte hun bhari barsat mein

yun hai ek raushan nami si chashm-e-sehar-andaz mein

subh ko shabnam ho jaise mariz-e-parwaz mein

jaise kohre mein koi tabinda manzar dur ka

jaise pichhli raat ke sine pe Dora nur ka

aise izmehlal par duniya ki barnai nisar

aisi bimari par ejaz-e-masihai nisar