حسن

اس حسن کو اب کیجیے کس حسن سے تعبیر

یہ حسن نظر پاش ہے یا عکس تخیل

یہ نیم نگاہی ہے کہ جلوؤں کا تسلسل

یہ حسن ترنم ہے تبسم ہے کہ طوفان

یا جلوۂ شاداب حجابوں میں نمایاں

یہ حسن کا حاصل ہے کہ جلوؤں کا تقاضا

دامان نظر پردۂ محمل ہے سراپا

یہ جلوۂ بے تاب ہے یا برق شرر خیز

یا جام محبت ہے کہ جذبات سے لبریز

نظارۂ گل رنگ ہے پیمانۂ راحت

عکس نظر افروز ہے آئینۂ فطرت

اک پیکر حیرت ہے کہ اک سحر کی تصویر

دامان فضا پر ہے خیالات کی تحریر

تسلیم ہے کہ مائیگیٔ نطق کی تقصیر