kuchh de ise ruKHsat kar

kuchh de ise ruḳhsat kar kyuuñ aañkh jhukā lī hai

haañ dar pe tire maulā! 'inshā' bhī savālī hai

is baat pe kyuuñ is kī itnā bhī hijāb aa.e

fariyād se be-bahra kashkol se ḳhālī hai

shā.er hai to adnā hai, āshiq hai to rusvā hai

kis baat meñ achchhā hai kis vasf meñ aalī hai

kis diin kā murshid hai, kis kesh kā mojid hai

kis shahr kā shahna hai kis des kā vaalī hai?

tāzīm ko uThte haiñ is vāste dil vaale

hazrat ne mashīḳhat kī ik tarah nikālī hai

āvāra o sargardāñ kafanī-ba-gulū-pechāñ

dāmāñ bhī durīda hai gudḌī bhī sambhālī hai

āvāra hai rāhoñ meñ, duniyā kī nigāhoñ meñ

izzat bhī miTā lī hai tamkīñ bhī gañvā lī hai

ādāb se begāna, dar aayā hai dīvāna

ne haath meñ tohfa hai, ne saath meñ Daalī hai

baḳhshish meñ ta.ammul hai aur aañkh jhukā lī hai

kuchh dar pe tire maulā, ye baat nirālī hai

'inshā' ko bhī ruḳhsat kar, 'inshā' ko bhī kuchh de de

'inshā' se hazāroñ haiñ, 'inshā' bhī savālī hai

kuchh de ise ruKHsat kar kyun aankh jhuka li hai

han dar pe tere maula! 'insha' bhi sawali hai

is baat pe kyun is ki itna bhi hijab aae

fariyaad se be-bahra kashkol se KHali hai

shaer hai to adna hai, aashiq hai to ruswa hai

kis baat mein achchha hai kis wasf mein aali hai

kis din ka murshid hai, kis kesh ka mojid hai

kis shahr ka shahna hai kis des ka wali hai?

tazim ko uThte hain is waste dil wale

hazrat ne mashiKHat ki ek tarah nikali hai

aawara o sargardan kafani-ba-gulu-pechan

daman bhi durida hai gudDi bhi sambhaali hai

aawara hai rahon mein, duniya ki nigahon mein

izzat bhi miTa li hai tamkin bhi ganwa li hai

aadab se begana, dar aaya hai diwana

ne hath mein tohfa hai, ne sath mein Dali hai

baKHshish mein tammul hai aur aankh jhuka li hai

kuchh dar pe tere maula, ye baat nirali hai

'insha' ko bhi ruKHsat kar, 'insha' ko bhi kuchh de de

'insha' se hazaron hain, 'insha' bhi sawali hai