ibn-e-ziyaad ka farman

tumhārī haDDiyāñ muḌtī nahīñ haiñ

rahm-e-mādar se nikalne ke liye betāb ho

sote raho ye ghar grihastī kā zamāna hai

maveshī astabal meñ jā.eñge aur uuñT ḳheme meñ

faras ibn-e-ziyāda ke liye uzv ziyāda hai

savārī vāste mushkī hiran zanjīr karte haiñ

zamīn-e-shor se shorīda-sar ifrīt se baune

samundar se gulābī machhliyāñ

miTTī se sūraj mukh kā jañgal

chār-dīvārī se uTh kar dekhtā hai

āñganoñ meñ hal nahīñ chalte

abu-suifyān se maiñ ne sunā thā

abu-suifyān se maiñ ne sunā thā

āñganoñ kā haal ḳhemoñ kī ḳhabar ghoḌoñ ke jal jaane kā qissa

jab bidak kar bhaag uThe the maveshī uuñT sūraj-mukh sipah-zāde

abu-suifyān ke beTe

abu-suifyān se maiñ ne sunā thā

abu-suifyān se maiñ ne sunā hai

āñganoñ kī ḳhair likkhī hai ziyād-ibn-e-ziyāda ne

na.ī beleñ chaḌhā.ī haiñ purānī kursiyoñ par

mez par ḳhargosh paalā hai

ghaḌoñ meñ nāriyal kī kāsht kī hai

beach añgnā.ī meñ likkhā hai

tumhārī haDDiyāñ muḌtī nahīñ haiñ

rahm-e-mādar se nikalne ke liye betāb ho

ye ghar grihastī kā zamāna hai

maveshī astabal meñ jā.eñge aur uuñT ḳheme meñ

tumhaari haDDiyan muDti nahin hain

rahm-e-madar se nikalne ke liye betab ho

sote raho ye ghar grihasti ka zamana hai

maweshi astabal mein jaenge aur unT KHeme mein

faras ibn-e-ziyaada ke liye uzw ziyaada hai

sawari waste mushki hiran zanjir karte hain

zamin-e-shor se shorida-sar ifrit se baune

samundar se gulabi machhliyan

miTTi se suraj mukh ka jangal

chaar-diwari se uTh kar dekhta hai

aanganon mein hal nahin chalte

abu-suifyan se main ne suna tha

abu-suifyan se main ne suna tha

aanganon ka haal KHemon ki KHabar ghoDon ke jal jaane ka qissa

jab bidak kar bhag uThe the maweshi unT suraj-mukh sipah-zade

abu-suifyan ke beTe

abu-suifyan se main ne suna tha

abu-suifyan se main ne suna hai

aanganon ki KHair likkhi hai ziyaad-ibn-e-ziyaada ne

nai belen chaDhai hain purani kursiyon par

mez par KHargosh pala hai

ghaDon mein nariyal ki kasht ki hai

beach angnai mein likkha hai

tumhaari haDDiyan muDti nahin hain

rahm-e-madar se nikalne ke liye betab ho

ye ghar grihasti ka zamana hai

maweshi astabal mein jaenge aur unT KHeme mein