idrak

merī paidā.ish ke baa'd

sab se pahle merī maañ paidā huī

phir dūsre rishte

ta'alluq

dard aur vābastagī

kā.enātī rishtoñ kā bār-e-garāñ

aur phir

chupke se tū paidā huī

rang

ḳhushbū

ḳhvāb sā terā vajūd

dā.era-dar-dā.era

be-karāñ vus'at sameTe

ik ikaa.ī

maiñ ne tere rang ḳhushbū ḳhvāb se

apne andar ik jahān-e-tāza kī tā'mīr kī

aur safar par chal paḌā

misl-e-mauj-e-tah-nashīñ

apne hī sāhil kāTtā

gahrā.iyoñ se jūjhtā

aage baḌhā

taht-andar-taht ke lambe safar meñ

terā paikar merā ḳhvāb

ḳhvāb merā hausla

ḳhvāb terī justujū

apnī talāsh

aaj tak garm-e-safar huuñ

andarūn-e-zāt-andar-zāt

har taraf terā vajūd

har taraf merā zuhūr

aks-andar-aks maiñ

ḳhvāb-andar-ḳhvāb tū

ḳhvāb kā ye silsila

dā.era-dar-dā.era

duur tak phailā huā

ḳhvāb kī tajsīm-kārī

zindagī merī

mirā zād-e-safar

mausamoñ kī zad pe haiñ tanhā huuñ aaj

ek bosīda shajar sā

vaqt ke nezoñ se chhalnī

zard shāḳhoñ se ta'alluq qat’ hone kā qalaq

ḳhushk pattoñ se sukaḌte TūTte rishtoñ kā ġham

aur taḌaḳhtī chhāloñ se kamzor-tar hotī huī vābastagī ke karb se ḳhasta-tar haal

dam-ba-dam nazdīk aatī dhund ke us paar se

sun rahā huuñ aane vaale mausamoñ ke tāza-dam qadmoñ kī chaap

sabz shāḳhoñ taaza pattoñ aur na.ī chhāloñ ke giit

tū kahāñ hai mere ḳhvāb

āḳhirī lamha hai

aa mirī āñkhoñ se dekh

mujh se pahle

mar rahī hai

lamha-lamha aaj

saarī kā.enāt

meri paidaish ke ba'd

sab se pahle meri man paida hui

phir dusre rishte

ta'alluq

dard aur wabastagi

kaenati rishton ka bar-e-garan

aur phir

chupke se tu paida hui

rang

KHushbu

KHwab sa tera wajud

daera-dar-daera

be-karan wus'at sameTe

ek ikai

main ne tere rang KHushbu KHwab se

apne andar ek jahan-e-taza ki ta'mir ki

aur safar par chal paDa

misl-e-mauj-e-tah-nashin

apne hi sahil kaTta

gahraiyon se jujhta

aage baDha

taht-andar-taht ke lambe safar mein

tera paikar mera KHwab

KHwab mera hausla

KHwab teri justuju

apni talash

aaj tak garm-e-safar hun

andarun-e-zat-andar-zat

har taraf tera wajud

har taraf mera zuhur

aks-andar-aks main

KHwab-andar-KHwab tu

KHwab ka ye silsila

daera-dar-daera

dur tak phaila hua

KHwab ki tajsim-kari

zindagi meri

mera zad-e-safar

mausamon ki zad pe hain tanha hun aaj

ek bosida shajar sa

waqt ke nezon se chhalni

zard shaKHon se ta'alluq qat’ hone ka qalaq

KHushk patton se sukaDte TuTte rishton ka gham

aur taDaKHti chhaalon se kamzor-tar hoti hui wabastagi ke karb se KHasta-tar haal

dam-ba-dam nazdik aati dhund ke us par se

sun raha hun aane wale mausamon ke taza-dam qadmon ki chap

sabz shaKHon taza patton aur nai chhaalon ke git

tu kahan hai mere KHwab

aaKHiri lamha hai

aa meri aankhon se dekh

mujh se pahle

mar rahi hai

lamha-lamha aaj

sari kaenat