idrak

vaqt dariyā kī mānind bahtā rahegā sadā

jagmagāte raheñge sitāre

yūñhī shab kī poshāk meñ

gul khilātī rahegī havā

tā-abad aab meñ, ḳhaak meñ

īstāda raheñge ḳhayābāñ ḳhayābāñ

ye sarv-o-sanobar yūñhī

sāhiloñ par yūñhī

lañgar-andāz hoñge jahāz

aur bachche yūñhī sīpiyāñ chunñe

aate raheñge sadā

yūñhī mela rahegā

zamāne ke kūchoñ meñ

bāzār meñ!

aur insān zinda rahegā sadā

ek paikār meñ

ik zamāne talak ham bhī sab kī tarah

yūñhī sochā kiye

yūñhī samjhā kiye

aur shab-o-roz kā be-nishāñ qāfila

parda-e-ġhaib meñ

gum-shuda manziloñ kī taraf

ḳhāmushī se rahā gāmzan

zindagī meñ achānak phir ik roz

ik hādsa ho gayā

jis kī shiddat se ik umr kā

sehar-e-fikr-o-nazar TuuT bikhrā

to āḳhir ye uqda khulā

vaqt dariyā hai lekin ye ḳhud

ik samundar meñ jā girtā hai

us samundar kī jānib hai

hastī kā saarā safar

aañkh ne aaj tak jitne manzar bhī dekhe

vo sab us ke

apne tarāshīda the

aur dil meñ dhaḌaktā huā

tajrīd-e-vahm-o-gumāñ ke sivā kuchh nahīñ

ārzu-e-ġham-e-āgahī aisī arzāñ nahīñ

ziist ke dūsre rāstoñ kī tarah

rāh-e-kār-e-junūñ itnī āsāñ nahīñ

hai bulandī kī jānib agar zindagī kā safar

phir to kuchh aur haiñ manzileñ aadmī ke liye

jin ke har gaam par, zindagī ke liye

hai sabāt-e-abad muntazir

āp-apnī nafī ke amal se

guzarnā paḌegā use

mahbas-e-āb-o-gil se

nikalnā paḌegā use

waqt dariya ki manind bahta rahega sada

jagmagate rahenge sitare

yunhi shab ki poshak mein

gul khilati rahegi hawa

ta-abad aab mein, KHak mein

istada rahenge KHayaban KHayaban

ye sarw-o-sanobar yunhi

sahilon par yunhi

langar-andaz honge jahaz

aur bachche yunhi sipiyan chunne

aate rahenge sada

yunhi mela rahega

zamane ke kuchon mein

bazar mein!

aur insan zinda rahega sada

ek paikar mein

ek zamane talak hum bhi sab ki tarah

yunhi socha kiye

yunhi samjha kiye

aur shab-o-roz ka be-nishan qafila

parda-e-ghaib mein

gum-shuda manzilon ki taraf

KHamushi se raha gamzan

zindagi mein achanak phir ek roz

ek hadsa ho gaya

jis ki shiddat se ek umr ka

sehar-e-fikr-o-nazar TuT bikhra

to aaKHir ye uqda khula

waqt dariya hai lekin ye KHud

ek samundar mein ja girta hai

us samundar ki jaanib hai

hasti ka sara safar

aankh ne aaj tak jitne manzar bhi dekhe

wo sab us ke

apne tarashida the

aur dil mein dhaDakta hua

tajrid-e-wahm-o-guman ke siwa kuchh nahin

aarzu-e-gham-e-agahi aisi arzan nahin

zist ke dusre raston ki tarah

rah-e-kar-e-junun itni aasan nahin

hai bulandi ki jaanib agar zindagi ka safar

phir to kuchh aur hain manzilen aadmi ke liye

jin ke har gam par, zindagi ke liye

hai sabaat-e-abad muntazir

aap-apni nafi ke amal se

guzarna paDega use

mahbas-e-ab-o-gil se

nikalna paDega use