idrak

vo merī ruuh kā maqsūd-o-faḳhr-e-maujūdāt

usī ke nuur se raushan hai jalva-gāh-e-sifāt

sikhā rahī hai ḳhirad tujh ko fann-e-shīsha-garī

ajab nahīñ jo pareshāñ ho kārobār-e-hayāt

har ek zarre meñ haiñ laakh bijliyāñ ai dost

nigāh-e-shauq na ho jaa.e markaz-e-āfāt

sun ai farefta-e-qissa-hā-e-hijr-o-visāl

amīq-tar haiñ samundar se zindagī ke nikāt

ḳhudī meñ Duub ke hangāma aazmā ho jā

ḳhudī na ho to na soz-e-yaqīñ na soz-e-hayāt

mirī nigāh ḳhurāfāt-e-māddī pe nahīñ

ḳhirad hai past haqīqat hai arfa.a'ud-darajāt

nazar milā ki batā.ūñ ye zindagī kyā hai

na ho ḳhumār to baḌhtā nahīñ mazāq-e-hayāt

zamīn-e-shor meñ bāġh-e-hayāt kar ta.amīr

yaqīn-o-azm se hāsil hai aadmī ko sabāt

sukūn-e-dīda-e-tishna haiñ mauja-hā-e-sarāb

ḳhudā kare ki na TuuTe tilism-e-lāt-o-manāt

wo meri ruh ka maqsud-o-faKHr-e-maujudat

usi ke nur se raushan hai jalwa-gah-e-sifat

sikha rahi hai KHirad tujh ko fann-e-shisha-gari

ajab nahin jo pareshan ho karobar-e-hayat

har ek zarre mein hain lakh bijliyan ai dost

nigah-e-shauq na ho jae markaz-e-afat

sun ai farefta-e-qissa-ha-e-hijr-o-visal

amiq-tar hain samundar se zindagi ke nikat

KHudi mein Dub ke hangama aazma ho ja

KHudi na ho to na soz-e-yaqin na soz-e-hayat

meri nigah KHurafat-e-maddi pe nahin

KHirad hai past haqiqat hai arfa'ud-darajat

nazar mila ki bataun ye zindagi kya hai

na ho KHumar to baDhta nahin mazaq-e-hayat

zamin-e-shor mein bagh-e-hayat kar tamir

yaqin-o-azm se hasil hai aadmi ko sabaat

sukun-e-dida-e-tishna hain mauja-ha-e-sarab

KHuda kare ki na TuTe tilism-e-lat-o-manat