id ka din

aaj kā din kaisā bā-raunaq hai bachcho vaah vaah

mard būḌhe hoñ ki bachche jā rahe haiñ eid-gāh

aaj kā din ham ne paayā roze rakh kar ek maah

roza-dāroñ ke liye allāh kā in.aam hai

aaj kā din hai ḳhushī kā iid jis kā naam

chāñd dekhā ham ne kal sūraj ke chhup jaane ke ba.ad

chhup gayā phir vo bhī jaldī jalva dikhlāne ke ba.ad

ham ne chillā kar kahā masjid se ghar aane ke ba.ad

iid kal hī ho rahī hai ittilā.a-e-ām hai

aaj kā din hai ḳhushī kā iid jis kā naam hai

niiñd bhī aa.e nahīñ jaage ḳhushī meñ raat bhar

aane vaalī sub.h par thī bas tasavvur kī nazar

ham ne koshish bhī nahīñ kī niiñd kī ye maan kar

rat-jage ke roz āḳhir niiñd kā kyā kaam hai

aaj kā din hai ḳhushī kā iid jis kā naam hai

ġhusl kar ke aaj pahne ham ne vo kapḌe na.e

iid ke din ke liye hī the jo silvā.e ga.e

saath meñ abbū ke ham bhī eid-gāh ruḳhsat hue

ham ne dekhā har zabāñ par zikr-e-rab har gaam hai

aaj kā din hai ḳhushī kā iid jis kā naam hai

aaj phūloñ kī tarah sab ke hī chehre the khile

dī mubārakbād un ko bhī the ki jin se gile

koī apnā ho parāyā ho gale sab se mile

mel ho sab se yahī to maqsad-e-islām hai

aaj kā din hai ḳhushī kā iid jis kā naam hai

iid kā khānā thā sub.hān-allāh kaisā lā-javāb

thiiñ siva.iyāñ qorma shiir aur biryānī kabāb

ham uThe ḳhush-zā.eqa khānoñ se ho kar faizyāb

Dish seva.iyoñ kī bahut marġhūb ḳhās-o-ām hai

aaj kā din hai ḳhushī kā iid jis kā naam hai

koī daulat-mand insāñ ho ki ho koī ġharīb

koī rishte-dār ham-sāya ho yā koī raqīb

iid vo hai jis meñ hāsil ho ḳhushī sab ko nasīb

dar-haqīqat iid kā 'sāhil' yahī paiġhām hai

aaj kā din hai ḳhushī kā iid jis kā naam hai

aaj ka din kaisa ba-raunaq hai bachcho wah wah

mard buDhe hon ki bachche ja rahe hain eid-gah

aaj ka din hum ne paya roze rakh kar ek mah

roza-daron ke liye allah ka inam hai

aaj ka din hai KHushi ka id jis ka nam

chand dekha hum ne kal suraj ke chhup jaane ke baad

chhup gaya phir wo bhi jaldi jalwa dikhlane ke baad

hum ne chilla kar kaha masjid se ghar aane ke baad

id kal hi ho rahi hai ittilaa-e-am hai

aaj ka din hai KHushi ka id jis ka nam hai

nind bhi aae nahin jage KHushi mein raat bhar

aane wali subh par thi bas tasawwur ki nazar

hum ne koshish bhi nahin ki nind ki ye man kar

rat-jage ke roz aaKHir nind ka kya kaam hai

aaj ka din hai KHushi ka id jis ka nam hai

ghusl kar ke aaj pahne hum ne wo kapDe nae

id ke din ke liye hi the jo silwae gae

sath mein abbu ke hum bhi eid-gah ruKHsat hue

hum ne dekha har zaban par zikr-e-rab har gam hai

aaj ka din hai KHushi ka id jis ka nam hai

aaj phulon ki tarah sab ke hi chehre the khile

di mubarakbaad un ko bhi the ki jin se gile

koi apna ho paraya ho gale sab se mile

mel ho sab se yahi to maqsad-e-islam hai

aaj ka din hai KHushi ka id jis ka nam hai

id ka khana tha subhan-allah kaisa la-jawab

thin siwaiyan qorma shir aur biryani kabab

hum uThe KHush-zaeqa khanon se ho kar faizyab

Dish sewaiyon ki bahut marghub KHas-o-am hai

aaj ka din hai KHushi ka id jis ka nam hai

koi daulat-mand insan ho ki ho koi gharib

koi rishte-dar ham-saya ho ya koi raqib

id wo hai jis mein hasil ho KHushi sab ko nasib

dar-haqiqat id ka 'sahil' yahi paigham hai

aaj ka din hai KHushi ka id jis ka nam hai