id

kaho ye muġhannī se gaa.e chalā jā

navā-e-masarrat sunā.e chalā jā

masarrat ke muzhde ko laa.e chalā jā

zamāne ko be-ḳhud banā.e chalā jā

zamāne pe chhā.ī hai īd-e-masarrat

dul.han ban ke aa.ī hai īd-e-masarrat

munāsib hai kuchh intizām-e-masarrat

karūñ ḳhalq ko shād-kām-e-masarrat

liye jā.ūñ maiñ dil se nām-e-masarrat

salām-e-masarrat kalām-e-masarrat

masarrat bhī apnī jagah jhūmtī hai

qadam iid kā ab ḳhushī chūmtī hai

vatan kī mohabbat ke naġhme ko gā kar

harīfoñ ko apne gale se lagā kar

mohabbat se ġhairoñ ko qaabū meñ lā kar

jo rūThe hue haiñ unheñ bhī manā kar

manāo ḳhushī iid kī roza-dāro

dikhāo ḳhushī iid kī roza-dāro

kaho ye mughanni se gae chala ja

nawa-e-masarrat sunae chala ja

masarrat ke muzhde ko lae chala ja

zamane ko be-KHud banae chala ja

zamane pe chhai hai id-e-masarrat

dulhan ban ke aai hai id-e-masarrat

munasib hai kuchh intizam-e-masarrat

karun KHalq ko shad-kaam-e-masarrat

liye jaun main dil se nam-e-masarrat

salam-e-masarrat kalam-e-masarrat

masarrat bhi apni jagah jhumti hai

qadam id ka ab KHushi chumti hai

watan ki mohabbat ke naghme ko ga kar

harifon ko apne gale se laga kar

mohabbat se ghairon ko qabu mein la kar

jo ruThe hue hain unhen bhi mana kar

manao KHushi id ki roza-daro

dikhao KHushi id ki roza-daro