‘id ke din ka nauha

mirā beTā abhī tak jail meñ hai

manā.ūñ ‘iid kaise

maiñ kaise ‘iid kar luuñ

na.e kapḌe pahan luuñ

mirā beTā

ki jis kī 'umr aThārah se kam hai

vafā-paikar

farishtoñ sā

fazāoñ meñ sharāfat kī palā hai

maiñ us kī maañ huuñ

kaise ‘iid kar luuñ

mirā ma.asūm beTā jo

nahīñ vāqif zamāne kī havāoñ se

kabhī dekhī na thī us ne

ye firqoñ kī junūñ-ḳhezī

pas-e-parda mazāhib ke

ta'assub ne

hamāre munsifoñ kī bhī

basīrat chhīn lī hai aur

unheñ andhā banā Daalā

na thā mā'lūm ye sab kuchh

tasādum ho rahe the jab

vo bas az-rāh-e-hamdardī

faqat insāniyat insān ke naate

bachā.ī thiiñ ka.ī jāneñ

na jin ko jāntā pahchāntā thā vo

sabhī the ajnabī phir bhī

bachā laayā thā un ko Dūbne se gahre paanī meñ

yahī ik jurm thā us kā

jo ab tak jail meñ hai vo

maiñ kaise ‘iid kar luuñ

kis tarah pahnūñ na.e kapḌe

maiñ us kī maañ

manā.ūñ ‘iid kaise

mera beTa abhi tak jail mein hai

manaun ‘id kaise

main kaise ‘id kar lun

nae kapDe pahan lun

mera beTa

ki jis ki 'umr aThaarah se kam hai

wafa-paikar

farishton sa

fazaon mein sharafat ki pala hai

main us ki man hun

kaise ‘id kar lun

mera masum beTa jo

nahin waqif zamane ki hawaon se

kabhi dekhi na thi us ne

ye firqon ki junun-KHezi

pas-e-parda mazahib ke

ta'assub ne

hamare munsifon ki bhi

basirat chhin li hai aur

unhen andha bana Dala

na tha ma'lum ye sab kuchh

tasadum ho rahe the jab

wo bas az-rah-e-hamdardi

faqat insaniyat insan ke nate

bachai thin kai jaanen

na jin ko jaanta pahchanta tha wo

sabhi the ajnabi phir bhi

bacha laya tha un ko Dubne se gahre pani mein

yahi ek jurm tha us ka

jo ab tak jail mein hai wo

main kaise ‘id kar lun

kis tarah pahnun nae kapDe

main us ki man

manaun ‘id kaise