id

zabāñ par iid kā naġhma hai dil murjhāyā jaatā hai

laboñ par hai tabassum aur kaleja muñh ko aatā hai

ki nangā hai kisī kambaḳht kā jism aaj ke din bhī

kahīñ dībā-o-atlas kā amāma jagmagātā hai

gale milne kā sāmāñ aur ye paa.eñ baaġh kī saj-dhaj

yahāñ aish-o-masarrat kā sabaq dohrāyā jaatā hai

udhar us menD par is soch meñ baiThā hai ik dahqāñ

ki dekhe aaj kī Daalī meñ kyā in.aam paatā hai

koī dast-e-hinā.ī meñ liye hai tahniyat kā ḳhat

kahīñ tarsā huā ik haat uTh kar thartharātā hai

uThā.ī hai kisī ne ḳhair-maqdam ke liye chilman

kisī kamsin ko aaj us kā rañDāpā khaa.e jaatā hai

kahīñ to qahqahoñ se chhat uḌī jaatī hai aivāñ kī

kahīñ ummīd kā TuuTā sā dīpak TimTimātā hai

ye kaisī iid hai ai dost is ko aur kuchh kah le

ki sunte the hilāl-e-īd rotoñ ko hañsātā hai

zaban par id ka naghma hai dil murjhaya jata hai

labon par hai tabassum aur kaleja munh ko aata hai

ki nanga hai kisi kambaKHt ka jism aaj ke din bhi

kahin diba-o-atlas ka amama jagmagata hai

gale milne ka saman aur ye paen bagh ki saj-dhaj

yahan aish-o-masarrat ka sabaq dohraya jata hai

udhar us meinD par is soch mein baiTha hai ek dahqan

ki dekhe aaj ki Dali mein kya inam pata hai

koi dast-e-hinai mein liye hai tahniyat ka KHat

kahin tarsa hua ek hat uTh kar thartharaata hai

uThai hai kisi ne KHair-maqdam ke liye chilman

kisi kamsin ko aaj us ka ranDapa khae jata hai

kahin to qahqahon se chhat uDi jati hai aiwan ki

kahin ummid ka TuTa sa dipak TimTimata hai

ye kaisi id hai ai dost is ko aur kuchh kah le

ki sunte the hilal-e-id roton ko hansata hai