ishwar pararthna

ai hamāre kibriyā tū ḳhāliq-o-ma.abūd hai

hast hai tū niist meñ mādūm meñ maujūd hai

shaukat-e-jāh-o-hasham hai manzil-e-maqsūd hai

apne bandoñ kī haqīqat tujh se kab mafqūd hai

ai ḳhudā ab tū zarā hindostāñ vāloñ ko dekh

haa.e tū bedād kī Thokar ke pāmāloñ ko dekh

zulm hai jaur-o-jafā hai har taraf bedād hai

gardish-e-dast-e-sitamgar se jahāñ barbād hai

dekhiye jis ko vahī maġhmūm hai nāshād hai

bachcha bachcha hind kā ab mā.il-e-fariyād hai

zulm kyā kyā ho rahe haiñ aaj māsūmoñ pe dekh

TūTtā kyā kyā sitam hai aaj mazlūmoñ pe dekh

jel-ḳhānoñ meñ hue jaate haiñ ab behāl se

saḳhtiyoñ se jabr se aur bhuuk kī haḌtāl se

kyā batā.eñ haal ai ḳhāliq zabān-e-hāl se

aa rahī hai ye sadā punjab se bangāl se

vaqf zindāñ kar diye haiñ be-gunāhoñ ke liye

naunihālān-e-vatan ke peshvāoñ ke liye

ik musībat ho to sah bhī leñ yahāñ bhar-mār hai

be-kasī-o-yās-o-hasrat darpa.e-āzār hai

gardanoñ pe teġh hai ḳhanjar hai aur talvār hai

aur bandūqoñ kī dil par goliyoñ kī maar hai

phir bhī ai bhagvān ham sīna-sipar haiñ dekh le

sirf tere naam par bāñdhe kamar haiñ dekh le

mehr kar apne karam kī apnī daulat de hameñ

zulm sahne ke liye behad tū quvvat de hameñ

daas sī tāqat de aur us sī shahādat de hameñ

laḌ mareñ bātil se haq par vo shujā.at de hameñ

zulm kī hastī miTā deñ nāla-e-shab-gīr se

phūñk deñ zulm-o-sitam ko koh-e-ātish-gīr se

hurriyat kā naam tak ab lab pe laanā jurm hai

na.ara-e-qaum-o-vatan tak ab lagānā jurm hai

kushtagān-e-sang-dil kā din manānā jurm hai

mādar-e-hindostāñ ko ġham sunānā jurm hai

hukm-e-qātil hai taḌapnā aur ronā hai manā

zaḳhm khānā hai ravā aur aah karnā hai manā

har taraf ho jazba-e-hubb-e-vatan shoa.la-fishāñ

gulḳhan-e-sozāñ nazar aa.e yahāñ kā har javāñ

haath meñ ho parcham-e-āzādī-e-hindostāñ

gā rahī hoñ giit āzādī kā har sū vādiyāñ

phir yaqīñ aa.e 'suḳhan' ye inqilāb hai zindābād

hindū-o-muslim kā haañ ab rang laayā hai jihād

ai hamare kibriya tu KHaliq-o-mabud hai

hast hai tu nist mein madum mein maujud hai

shaukat-e-jah-o-hasham hai manzil-e-maqsud hai

apne bandon ki haqiqat tujh se kab mafqud hai

ai KHuda ab tu zara hindostan walon ko dekh

hae tu bedad ki Thokar ke pamalon ko dekh

zulm hai jaur-o-jafa hai har taraf bedad hai

gardish-e-dast-e-sitamgar se jahan barbaad hai

dekhiye jis ko wahi maghmum hai nashad hai

bachcha bachcha hind ka ab mail-e-fariyaad hai

zulm kya kya ho rahe hain aaj masumon pe dekh

TuTta kya kya sitam hai aaj mazlumon pe dekh

jel-KHanon mein hue jate hain ab behaal se

saKHtiyon se jabr se aur bhuk ki haDtal se

kya bataen haal ai KHaliq zaban-e-haal se

aa rahi hai ye sada punjab se bangal se

waqf zindan kar diye hain be-gunahon ke liye

naunihaalan-e-watan ke peshwaon ke liye

ek musibat ho to sah bhi len yahan bhar-mar hai

be-kasi-o-yas-o-hasrat darpae-azar hai

gardanon pe tegh hai KHanjar hai aur talwar hai

aur banduqon ki dil par goliyon ki mar hai

phir bhi ai bhagwan hum sina-sipar hain dekh le

sirf tere nam par bandhe kamar hain dekh le

mehr kar apne karam ki apni daulat de hamein

zulm sahne ke liye behad tu quwwat de hamein

das si taqat de aur us si shahadat de hamein

laD maren baatil se haq par wo shujaat de hamein

zulm ki hasti miTa den nala-e-shab-gir se

phunk den zulm-o-sitam ko koh-e-atish-gir se

hurriyat ka nam tak ab lab pe lana jurm hai

nara-e-qaum-o-watan tak ab lagana jurm hai

kushtagan-e-sang-dil ka din manana jurm hai

madar-e-hindostan ko gham sunana jurm hai

hukm-e-qatil hai taDapna aur rona hai mana

zaKHm khana hai rawa aur aah karna hai mana

har taraf ho jazba-e-hubb-e-watan shoala-fishan

gulKHan-e-sozan nazar aae yahan ka har jawan

hath mein ho parcham-e-azadi-e-hindostan

ga rahi hon git aazadi ka har su wadiyan

phir yaqin aae 'suKHan' ye inqilab hai zindabaad

hindu-o-muslim ka han ab rang laya hai jihad