ijazat ho to tumko pyar kar lun

dil-e-pazh-murda ko gulzār kar luuñ

mohabbat ko gale kā haar kar luuñ

javānī husn se sarshār kar luuñ

ijāzat ho to tum ko pyaar kar luuñ

mujhe duniyā kī daulat de rahā hai

ye paiġhām-e-masarrat de rahā hai

tumhārā husn dāvat de rahā hai

ijāzat ho to tum ko pyaar kar luuñ

tamannāoñ ke bādal chhā rahe haiñ

javānī ko mirī taḌpā rahe haiñ

mire jazbāt umDe aa rahe haiñ

ijāzat ho to tum ko pyaar kar luuñ

gulābī aañkh meñ Dore paḌe haiñ

papoTe bhī to bojhal ho rahe haiñ

patā dil kā tumhāre de rahe haiñ

ijāzat ho to tum ko pyaar kar luuñ

hai merī jaan tishna dil hai pyāsā

mujhe dekhoge yuuñ kab tak taḌaptā

karam ab to karam mujh par ḳhudārā

ijāzat ho to tum ko pyaar kar luuñ

uThā diije bas ab parda hayā kā

hai dil kā ye taqāze par taqāzā

zarā sī haañ se ban jā.egī duniyā

ijāzat ho to tum ko pyaar kar luuñ

tumhāre husn meñ tābindagī hai

sitāroñ jaisī is meñ raushnī hai

kashish hai aur is meñ dilkashī hai

ijāzat ho to tum ko pyaar kar luuñ

milī hai muddatoñ meñ mujh ko ḳhalvat

baḌe arse meñ jaagī hai ye qismat

banā do mere ġham ko ab to rāhat

ijāzat ho to tum ko pyaar kar luuñ

mirī behad tabī.at chāhtī hai

hamesha kī ye daulat chāhtī hai

tumhārī bas ijāzat chāhtī hai

ijāzat ho to tum ko pyaar kar luuñ

tumhārā ruup aafat Dhā rahā hai

ye ik armān bantā jā rahā hai

mire pahlū meñ dil lalchā rahā hai

ijāzat ho to tum ko pyaar kar luuñ

mohabbat ne machā dī dil meñ halchal

kiyā hai zabt ne betāb bekal

bas ai rūh-e-ravān-e-shauq-e-'afzal'

ijāzat ho to tum ko pyaar kar luuñ

dil-e-pazh-murda ko gulzar kar lun

mohabbat ko gale ka haar kar lun

jawani husn se sarshaar kar lun

ijazat ho to tum ko pyar kar lun

mujhe duniya ki daulat de raha hai

ye paigham-e-masarrat de raha hai

tumhaara husn dawat de raha hai

ijazat ho to tum ko pyar kar lun

tamannaon ke baadal chha rahe hain

jawani ko meri taDpa rahe hain

mere jazbaat umDe aa rahe hain

ijazat ho to tum ko pyar kar lun

gulabi aankh mein Dore paDe hain

papoTe bhi to bojhal ho rahe hain

pata dil ka tumhaare de rahe hain

ijazat ho to tum ko pyar kar lun

hai meri jaan tishna dil hai pyasa

mujhe dekhoge yun kab tak taDapta

karam ab to karam mujh par KHudara

ijazat ho to tum ko pyar kar lun

uTha dije bas ab parda haya ka

hai dil ka ye taqaze par taqaza

zara si han se ban jaegi duniya

ijazat ho to tum ko pyar kar lun

tumhaare husn mein tabindagi hai

sitaron jaisi is mein raushni hai

kashish hai aur is mein dilkashi hai

ijazat ho to tum ko pyar kar lun

mili hai muddaton mein mujh ko KHalwat

baDe arse mein jagi hai ye qismat

bana do mere gham ko ab to rahat

ijazat ho to tum ko pyar kar lun

meri behad tabiat chahti hai

hamesha ki ye daulat chahti hai

tumhaari bas ijazat chahti hai

ijazat ho to tum ko pyar kar lun

tumhaara rup aafat Dha raha hai

ye ek arman banta ja raha hai

mere pahlu mein dil lalcha raha hai

ijazat ho to tum ko pyar kar lun

mohabbat ne macha di dil mein halchal

kiya hai zabt ne betab bekal

bas ai ruh-e-rawan-e-shauq-e-'afzal'

ijazat ho to tum ko pyar kar lun