ijazat

vo kahte haiñ

maiñ kabhī zinda nahīñ thā

is liye na vo merī hañsī ke baare meñ kuchh batā sakte haiñ

na āñsuoñ ke baare meñ

yā ye ki jab maiñ chaltā thā

to mere paañv zamīñ par Thiik tarah se

paḌte bhī the yā nahīñ

unhoñ ne hamesha mujhe be-jān hī paayā

aise

ki merī nabz rukī huī thī

dil sākit

aur jism siyāh paḌ chukā thā

lekin merī āñkheñ puurī tarah khulī huī thiiñ

jin se unheñ ḳhauf aatā thā

lekin rafta rafta

un kā ḳhauf raf.a hotā gayā

un kā subūt ye hai

ki vo apnī bekār ashiyā

merī taraf uchhāl dete the

kabhī vaslī kā ḳhālī Dubā

ainak kī TuuTī huī kamānī

yā be taale kī koī chābī

agarche is baat se vo puurī tarah āgāh the

ki aisā karte hue

vo ek laash kī be-hurmatī kar rahe the

lekin ab vo is baat ke goyā aadī ho ga.e the

aisā karte hue

unheñ kisī qism kī jhijak

yā sharmindagī nahīñ hotī thī

shāyad unhoñ ne kisī vaqt merī laash ko

kahīñ Thikāne lagāne ke baare meñ bhī sochā ho

par aisā kar na paa.e hoñ

shāyad kisī ne unheñ aisā karne se rok diyā ho

shāyad vo merī khulī huī āñkheñ dekh kar Dar ga.e hoñ

shāyad vo ḳhud apnī nabzeñ TaTolne

apnī dhaḌkaneñ sunñe

aur apne jism meñ rūnumā hone vaalī tabdīliyoñ se

burī tarah ḳhā.if hone lage hoñ

apne is ḳhauf par qaabū paane ke liye

shāyad unhoñ ne apnī be-kār ashiyā

merī taraf uchhālnī shurūa kar dī hoñ

shāyad yuuñ vo apne liye

kisī na.e maz.hab kī buniyād Daal rahe hoñ

jis meñ unheñ

lāshoñ kī be-hurmatī kī khulī chhūT de dī ga.ī ho

maiñ in kī kisī ġhalat fahmī ko duur karne kī koshish nahīñ karūñgā

ki mere maslak meñ

lāshoñ kī be-hurmatī kī koī gunjā.ish nahīñ

zindoñ kī bhī nahīñ

wo kahte hain

main kabhi zinda nahin tha

is liye na wo meri hansi ke bare mein kuchh bata sakte hain

na aansuon ke bare mein

ya ye ki jab main chalta tha

to mere panw zamin par Thik tarah se

paDte bhi the ya nahin

unhon ne hamesha mujhe be-jaan hi paya

aise

ki meri nabz ruki hui thi

dil sakit

aur jism siyah paD chuka tha

lekin meri aankhen puri tarah khuli hui thin

jin se unhen KHauf aata tha

lekin rafta rafta

un ka KHauf rafa hota gaya

un ka subut ye hai

ki wo apni bekar ashiya

meri taraf uchhaal dete the

kabhi wasli ka KHali Duba

ainak ki TuTi hui kamani

ya be tale ki koi chabi

agarche is baat se wo puri tarah aagah the

ki aisa karte hue

wo ek lash ki be-hurmati kar rahe the

lekin ab wo is baat ke goya aadi ho gae the

aisa karte hue

unhen kisi qism ki jhijak

ya sharmindagi nahin hoti thi

shayad unhon ne kisi waqt meri lash ko

kahin Thikane lagane ke bare mein bhi socha ho

par aisa kar na pae hon

shayad kisi ne unhen aisa karne se rok diya ho

shayad wo meri khuli hui aankhen dekh kar Dar gae hon

shayad wo KHud apni nabzen TaTolne

apni dhaDkanen sunne

aur apne jism mein runuma hone wali tabdiliyon se

buri tarah KHaif hone lage hon

apne is KHauf par qabu pane ke liye

shayad unhon ne apni be-kar ashiya

meri taraf uchhaalni shurua kar di hon

shayad yun wo apne liye

kisi nae mazhab ki buniyaad Dal rahe hon

jis mein unhen

lashon ki be-hurmati ki khuli chhuT de di gai ho

main in ki kisi ghalat fahmi ko dur karne ki koshish nahin karunga

ki mere maslak mein

lashon ki be-hurmati ki koi gunjaish nahin

zindon ki bhi nahin