ek bar Tahalti phir aae

ik sīmīñ-badan ik tauba-shikan hai mahv-e-ḳhirām station par

māh-e-tābāñ māh-e-raushan māh-e-kāmil māh-e-anvar

iThlātī huī bal khātī huī āñchal pakḌe muñh ko moḌe

kuchh se bhiḌtī kuchh se kaTtī kuchh dil joḌe kuchh dil toḌe

madfūn hazāroñ ke armāñ ubhre hue gore shānoñ meñ

majrūh paḌe hoñge kitne in pardesī insānoñ meñ

kaalī matvālī āñkhoñ meñ pinhāñ be-rut kī barsāteñ

bebāk nazar kī shoḳhī meñ ḳhvābīda gunāhoñ kī rāteñ

fitrat kā sunahrā tohfa hai ye husn-o-ishq ke aalam meñ

yā tasvīroñ kī malika hai rūmān ke rangīñ album meñ

vo rafta-rafta ab merī nazroñ se chhuptī jaatī hai

ab station ke us jānib rahgīroñ ko bahkātī hai

purvā ke ik jhoñke kī tarah guzrī dil kī ābādī se

kaliyoñ ko be-mahkā.e hue chal dī hasrat kī vaadī se

dariyā kī ik mauj-e-sīmīñ sāhil se Takrā kar chal dī

barsāt ke dhuñdle bādal meñ ik barq sī lahrā kar chal dī

in chalte-phirte sāyoñ se ulfat kī tamanna kaun kare

jo apne bas se bāhar hoñ phir un kī parvā kaun kare

lekin haañ itnī ḳhvāhish hai ai kaash jo puurī ho jaa.e

allāh kare vo doshīza ik baar Tahaltī phir aa.e

ek simin-badan ek tauba-shikan hai mahw-e-KHiram station par

mah-e-taban mah-e-raushan mah-e-kaamil mah-e-anwar

iThlati hui bal khati hui aanchal pakDe munh ko moDe

kuchh se bhiDti kuchh se kaTti kuchh dil joDe kuchh dil toDe

madfun hazaron ke arman ubhre hue gore shanon mein

majruh paDe honge kitne in pardesi insanon mein

kali matwali aankhon mein pinhan be-rut ki barsaten

bebak nazar ki shoKHi mein KHwabida gunahon ki raaten

fitrat ka sunahra tohfa hai ye husn-o-ishq ke aalam mein

ya taswiron ki malika hai ruman ke rangin album mein

wo rafta-rafta ab meri nazron se chhupti jati hai

ab station ke us jaanib rahgiron ko bahkati hai

purwa ke ek jhonke ki tarah guzri dil ki aabaadi se

kaliyon ko be-mahkae hue chal di hasrat ki wadi se

dariya ki ek mauj-e-simin sahil se Takra kar chal di

barsat ke dhundle baadal mein ek barq si lahra kar chal di

in chalte-phirte sayon se ulfat ki tamanna kaun kare

jo apne bas se bahar hon phir un ki parwa kaun kare

lekin han itni KHwahish hai ai kash jo puri ho jae

allah kare wo doshiza ek bar Tahalti phir aae