ek laDki

ye dīvānī sī ik laḌkī

hasīñ bhī dilrubā bhī hai

abhī ma.asūm hai lekin

vafā se āshnā bhī hai

mire ghar kī haiñ dīvāreñ

usī ke rañg se raushan

usī ke dam se pākīza

mirī ummīd kā āñgan

jabīñ us kī sahar jaisī

azaañ detī huī āñkheñ

nazar kā imtihāñ letī

shab-e-tārīk sī zulfeñ

nigāheñ zindagī jaisī

adā.eñ chāñdnī jaisī

vafā us kī mirī ḳhātir

asā-e-mūsavī jaisī

taqaddus huur ke jaisā

sarāpā nuur ke jaisā

mukammal husn hai us kā

mire dastūr ke jaisā

nigāhoñ ke liye merī

ye hai tanvīr-e-mustaqbil

ye sub.h-e-nau kī manzil hai

ye hai tasvīr-e-mustaqbil

har ik andāz hai us kā

dhanak manzar kā ham-sāya

'valī' ye lāDlī beTī

mirī hastī kā sarmāya

ye dīvānī to hai lekin

yahī dānish-nishāñ hogī

isī kī god meñ pal kar

na.ī duniyā javāñ hogī

ye diwani si ek laDki

hasin bhi dilruba bhi hai

abhi masum hai lekin

wafa se aashna bhi hai

mere ghar ki hain diwaren

usi ke rang se raushan

usi ke dam se pakiza

meri ummid ka aangan

jabin us ki sahar jaisi

azan deti hui aankhen

nazar ka imtihan leti

shab-e-tarik si zulfen

nigahen zindagi jaisi

adaen chandni jaisi

wafa us ki meri KHatir

asa-e-musawi jaisi

taqaddus hur ke jaisa

sarapa nur ke jaisa

mukammal husn hai us ka

mere dastur ke jaisa

nigahon ke liye meri

ye hai tanwir-e-mustaqbil

ye subh-e-nau ki manzil hai

ye hai taswir-e-mustaqbil

har ek andaz hai us ka

dhanak manzar ka ham-saya

'wali' ye laDli beTi

meri hasti ka sarmaya

ye diwani to hai lekin

yahi danish-nishan hogi

isi ki god mein pal kar

nai duniya jawan hogi