ek nazm

maiñ ne us se kal ye kahā

tum english ke teacher ho

english ḳhuub paḌhāte ho

Keats kī nazm sunāte ho

shakespeare bhī paḌhāte ho

tum ne kabhī ye sochā hai

dil meñ utarte lahje meñ

tum tashrīh jo karte ho

kitnā dhyān maiñ detī huuñ

Keats ke baare kahte ho

kitne dilkash lamhoñ meñ

us ne nazmeñ kiiñ taḳhlīq

kyā hī kamāl thā shā.ir

tum jo havāla dete ho

titanic kā william kā

long fellow Henry kī aur

kabhī jo qaazī iisā kī

nazmeñ mujhe sunāte ho

in sab kā matlab kyā hai

hañs kar vo ye kahne lagā

kyoñ hotī ho tum be-zār

kyā merī bāteñ tum ko

bor hamesha kartī haiñ

kabhī to paḌh kar dekho tum

un kī sundar nazmoñ ko

phir ye nazmeñ qaarī par

ek jahān ma.ānī kā

jaise vā kar detī haiñ

tum bhī karogī phir mahsūs

pyaar bhare lamhoñ ko 'duā'

maiñ ne javāban us se kahā

suno suno tum merī baat

pyaar kī sundar bātoñ meñ

qisse aur kahānī meñ

dil saare aa jaate haiñ

guzre hue lamhe saare

lauT ke phir nahīñ aate haiñ

phir mujh se vo kahne lagā

ek alag hī manzar hai

in kī nazmoñ ke andar

rang-birangī ik duniyā

hai in nazmoñ meñ ābād

maiñ ne kahā us se lekin

in kī nazmoñ se merā

kyā lenā kyā denā hai

mere liye tum sab kuchh ho

in ke qisse rahne do

mat hī sunāo tum mujh ko

tum ḳhud bhī ik shā.ir ho

mere baare meñ tum ne

koī nazm likhī hai kyā

kahne lagā ye sun kar vo

haañ likkhī to hai ik nazm

maiñ ne tumhāre baare meñ

jis meñ tumhārī āñkhoñ kā

ik ḳhush-rang havāla hai

jis meñ tumhāre aur mere

pyaar kī madhur kahānī hai

maiñ ne kahā mere shā.ir

tum bas itnā batlāo

lamhe tum se kyā kahte

kyā kyā bāteñ karte haiñ

hañs kar vo ye kahne lagā

maiñ bātoñ ke dhāgoñ se

lamhe muqayyad kartā huuñ

dāman-e-dil bhar letā huuñ

tum se mohabbat karnā to inhī ko paḌh kar sīkhā hai

tere komal hāthoñ ko

dhīre se chhū letā huuñ

tere lams kī komaltā

so.e ḳhvāb jagātī hai

be-ḳhud ho kar maiñ tujh ko

bāñhoñ meñ bhar letā huuñ

pyaar tujhe kar letā huuñ

main ne us se kal ye kaha

tum english ke teacher ho

english KHub paDhate ho

Keats ki nazm sunate ho

shakespeare bhi paDhate ho

tum ne kabhi ye socha hai

dil mein utarte lahje mein

tum tashrih jo karte ho

kitna dhyan main deti hun

Keats ke bare kahte ho

kitne dilkash lamhon mein

us ne nazmen kin taKHliq

kya hi kamal tha shair

tum jo hawala dete ho

titanic ka william ka

long fellow Henry ki aur

kabhi jo qazi isa ki

nazmen mujhe sunate ho

in sab ka matlab kya hai

hans kar wo ye kahne laga

kyon hoti ho tum be-zar

kya meri baaten tum ko

bor hamesha karti hain

kabhi to paDh kar dekho tum

un ki sundar nazmon ko

phir ye nazmen qari par

ek jahan maani ka

jaise wa kar deti hain

tum bhi karogi phir mahsus

pyar bhare lamhon ko 'dua'

main ne jawaban us se kaha

suno suno tum meri baat

pyar ki sundar baaton mein

qisse aur kahani mein

dil sare aa jate hain

guzre hue lamhe sare

lauT ke phir nahin aate hain

phir mujh se wo kahne laga

ek alag hi manzar hai

in ki nazmon ke andar

rang-birangi ek duniya

hai in nazmon mein aabaad

main ne kaha us se lekin

in ki nazmon se mera

kya lena kya dena hai

mere liye tum sab kuchh ho

in ke qisse rahne do

mat hi sunao tum mujh ko

tum KHud bhi ek shair ho

mere bare mein tum ne

koi nazm likhi hai kya

kahne laga ye sun kar wo

han likkhi to hai ek nazm

main ne tumhaare bare mein

jis mein tumhaari aankhon ka

ek KHush-rang hawala hai

jis mein tumhaare aur mere

pyar ki madhur kahani hai

main ne kaha mere shair

tum bas itna batlao

lamhe tum se kya kahte

kya kya baaten karte hain

hans kar wo ye kahne laga

main baaton ke dhagon se

lamhe muqayyad karta hun

daman-e-dil bhar leta hun

tum se mohabbat karna to inhi ko paDh kar sikha hai

tere komal hathon ko

dhire se chhu leta hun

tere lams ki komalta

soe KHwab jagati hai

be-KHud ho kar main tujh ko

banhon mein bhar leta hun

pyar tujhe kar leta hun