ek sawal KHuda-e-bartar se

ham is zamīn o āsmāñ ke darmiyāñ

hairān haiñ aur sar-garāñ

ai ḳhudā-e-do-jahāñ!

ai harf-e-kun ke rāz-dāñ!

ai mamba-e-kaun-o-makāñ!

itnā to batlā de

koī aisī bhī duniyā hai

jahāñ insāniyat kī saaf peshānī pe

ilm o fan kī pau phaTtī ho aur

fikr o nazar ke ā.īnoñ se

nuur kī kirneñ ubaltī hoñ

diloñ meñ ḳhair o barkat kī duā.eñ gūñjtī hoñ

sub.h dam ākāsh ke nīlam tale

jām-e-haqīqat pī ke jiine kī tamannā raqs kartī ho

jahāñ ehsās ke kohre se

fikr-e-nau ke taare jhilmilāte hoñ

jahāñ hoñToñ pe harf-e-āgahī kī jot ho

āñkhoñ se hairat

zehn se vijdān ke chashme ubalte hoñ,

jahāñ rātoñ ke sannāTe meñ

dil mahv-e-niyāz-o-nāz rahtā ho

fazā-e-be-karāñ ke sahar kā hamrāz rahtā ho

mohabbat, ishq, dildārī, vafā unvān-e-hastī hoñ

uḳhuvvat, narm-guftārī atā-e-paimāna-edil hoñ

ḳhudā-e-lam-yazal batlā

koī aisī bhī duniyā hai

kahīñ aisā bhī hotā hai

siyāsat kī fusūñ-sāzī

tijārat kī ziyāñ-kārī

havas kī garm-bāzārī

kisī ayyār-e-quvvat kī jahāñ-dāri

meñ dam ghuTtā hai

har lamha azāb-e-jāvedāñ mālūm hotā hai

ḳhudā-vand! ye tere saada dil bande kahāñ jā.eñ?''

hum is zamin o aasman ke darmiyan

hairan hain aur sar-garan

ai KHuda-e-do-jahan!

ai harf-e-kun ke raaz-dan!

ai mamba-e-kaun-o-makan!

itna to batla de

koi aisi bhi duniya hai

jahan insaniyat ki saf peshani pe

ilm o fan ki pau phaTti ho aur

fikr o nazar ke aainon se

nur ki kirnen ubalti hon

dilon mein KHair o barkat ki duaen gunjti hon

subh dam aakash ke nilam tale

jam-e-haqiqat pi ke jine ki tamanna raqs karti ho

jahan ehsas ke kohre se

fikr-e-nau ke tare jhilmilate hon

jahan honTon pe harf-e-agahi ki jot ho

aankhon se hairat

zehn se wijdan ke chashme ubalte hon,

jahan raaton ke sannaTe mein

dil mahw-e-niyaz-o-naz rahta ho

faza-e-be-karan ke sahar ka hamraaz rahta ho

mohabbat, ishq, dildari, wafa unwan-e-hasti hon

uKHuwwat, narm-guftari ata-e-paimana-edil hon

KHuda-e-lam-yazal batla

koi aisi bhi duniya hai

kahin aisa bhi hota hai

siyasat ki fusun-sazi

tijarat ki ziyan-kari

hawas ki garm-bazari

kisi ayyar-e-quwwat ki jahan-dari

mein dam ghuTta hai

har lamha azab-e-jawedan malum hota hai

KHuda-wand! ye tere sada dil bande kahan jaen?