ek sitara aadarsh ka

ai tamāshā-gāh-e-ālam ro.e tū

māh-e-nau

ham dekhte tujh ko kis armān se

dekhte hī dekhte tahlīl ho jaanā tirā

dekhte ham

phir bhī tujh ko DhūñD rahte usī

suune ufuq meñ ai hilāl

vaqt ke dariyā meñ māhī-gīr ne

Daalā hai jaal

kis liye sāhil kā patthar ban ke

māhī-gīr

baiThe hoñ yahāñ

thaah meñ Duube hue vo mehr-o-māh

ban chuke hoñge ġhubār-e-rā.egāñ

yā tamāshā sīna-e-shamshīr se bāhar dam-e-shamshīr kā

maujoñ meñ bahtā

dekhte rahte ho tum

be-sabab āñkhoñ se kab

yuuñ ma.e chhalaktī hai

nashāt diid kī

kaun ho tum

aur gāgar apnī le jaatī ho

kis āñgan kī aur

vo suhānā sā ujālā

jhūmtā sāgar ke paar

gul-badāmāñ ek āñgan shaam ke taare kā hai

merā nahīñ

vo ghanā ban bhī purānā āshram hai

jhilmilātī os kā

merā nahīñ

maiñ to gūñge ḳhāk-dāñ kī

an-kahī

ai ajnabī

an-kahī se kahnī sunñī tak pahuñchnā

sahal kab hai

darmiyān haa.il milegā

ik ḳhalā-e-be-karāñ

soch lo

hai vaqt ab bhī

varna phir ai

bānū-e-ma.asūm-o-zīrak

ranjisheñ kitnī khaḌī haiñ raah meñ

phir na sāhil thā

na vo sāhil kā patthar

jo nazar aayā

vo tā-hadd-e-nazar phailā huā

ik pur-āshob-o-pur-asrār

bahr-e-nā-paidā kanār

ham ne insāñ kā janm paayā

sitāre gā rahe the

kis amal ke ijrā meñ

paayā sitāro

tum ne insāñ kā janm

ham to insāñ ke janm meñ bhī sitāre hī rahe

be-karāñ nīlāhaToñ meñ

rū jhamak uThtī hai rah rah kar

anā

kahkashāñ-dar-kahkashāñ bikhre savābit

aur sayyāroñ ke beach

fāsle jazb-o-kashish ke

un kī paimūda hadeñ

baḌhte baḌhte zaarī daa.im

banātunna.ash kī

ghaTte ghaTte varta dām-e-fanā

dhuum ketū be-muhārī meñ magan

ek jhālā sā baras kar khul gayā chiñgāriyoñ kā

kitnī tahzībeñ shahābī TimTimā kar bujh ga.iiñ

nagriyāñ bābul sī mahvash

shahpar-e-afrashtagāñ uljhe hue

jin kī surīlī taan haiñ

un kī ġharqābī kahānī hai

purānī bhī na.ī bhī

un kī apnī aatmā kī thaah se

umDe hue tūfān haiñ

apnī fitrat ke tajallī-zār se

TuuT kar girte kavākib

jā samāte haiñ ḳhudā jaane kahāñ

jā-ba-jā azdārahan kaale dahāne

jin kā muñh sab kuchh nigal kar phir khulā

der kitnī ho chukī

tab kahīñ jā kar vo ik din ye samajh paa.e

ki sannāTā

ḳhud apne dil ke andar kā thā

bāhar kā na thā

rustgār az-panja-e-bedardī-e-lail-o-nahār

band āñkhoñ ke nagar meñ

kaif-e-ālamgīr kā armāñ milā

jis se vāvailā nasheboñ kā na Takrāyā kabhī

vo auj-e-bām

sarsarī us se guzar jaane meñ pinhāñ āfiyat

ai rah-navard

ai nazar-var ai dil-āsā

rauzan-e-zulmāt hast-o-būd

ai paik-e-jahāñ-paimā ḳhizar

kiil sī dahlīz meñ paivast ye kaisī chamak hai

dhuul ajrām-e-falak kī

gutthiyāñ mauhūm sī rishtoñ kī ye kaisī haiñ

suljhāna nahīñ zinhār varna

hū kā aalam hai namūdān kī

sulajh jaane ke baad

sabza-e-naurasta ke parde meñ saare uuñch niich

pāTte rahne ke ai ānand

bahte pāniyoñ kī aatmā

kis ke haiñ ye ustuḳhvāñ

malbe meñ Dhalte ustuḳhvāñ

ḳhāk-e-uftāda kī aglī aur pichhlī

har parat ke

be-zabāñ ta.amīr-e-kār

mehrbāñ sā ik tabassum

aur shā.ista ishārā ghar kī jānib

jaise ghar ke bām-o-dar par ho navishta

har savāl-e-nā-shakebā kā javāb

phir udhar dekhā to sab kuchh

dasht-e-iḳhfā maiñ thā adiim

ġhaar kuTiyā.eñ machāneñ

ghar gharauñde

saare āsār-o-mazāhir

guuñj meñ apnī samo kar

le uḌī baañg chiil

vo safar be-sañg-e-mīl

ik adhūre āsmānī ḳhvāb kā

un kī āñkhoñ meñ ḳhumār

zeb-tan gard-o-ġhubār

jaise miTTī meñ sanī

dhaḌkaneñ dhartī kī

nar-nārī kī tajsīmoñ meñ ālam-e-āshkār

aur phir uftād par uftād

duur uftādgī

shāhrāheñ nā-tarāshīda sabhī ḳhushkī tirī kī

aur kāġhaz bhī pata kā gum-shuda

be-ḳhabar nikle havā-e-dasht ke jhoñke sabhī

aur sahal-añgār taa.ir bhī na de paa.e surāġh

hai kahāñ arfāt

vo ik vādī-e-dūr-darāz

raah meñ āñkheñ bichhā.e

phuul nargis ke mile

raah meñ mahke gulāb aur raah meñ laale khile

diid kī lekin unheñ raftār fursat bhī to de

munkashif kartī huī

be-nām jal-pariyoñ ko

gahre pāniyoñ meñ ek lamhātī tarañg

be-nishān ban-bāsiyoñ par

Tahniyoñ meñ aas ke māman kisī

bhūle bhaTke zamzama kī raah takte

dvaar khole jāgte haiñ

raat kaalī barshgālī

jugnuoñ kī nā-gahāñ yalġhār

phir gahrā añdherā

aur jibillat kī athāh

shaktiyoñ kā

ban meñ Derā

man meñ Derā

sāhiloñ kī ret meñ sauñpe hue

ik vadī.at kī tarah hashrāt-e-āb

ḳhol apne toḌte haiñ

aur be-rahbarī hī āhista-ḳhirām

apne man kī chāñdnī meñ

reñgne lagte haiñ

shor-e-āb bhī kahte haiñ vo

ik samt hai

ik samt hai sehr-e-kashish bhī

sab dishā.eñ nā-gahāñ

ik saath bhartī haiñ huñkārā

bhūlne lagte haiñ jab ma.asūm zaa.er

jal dishā

kitne ḳhūñ-ālūd panje

kitne ḳhanjar ghaat meñ haiñ

phir bhī jaarī yātrā

vo hazar be-barg-o-sāmāñ

ghar ḳhas-o-ḳhāshāk kī rachnā adhūrī

jis meñ fitrat

jhāñktī rahtī ki dekhe

apne aa.iin to ufuq kā jamāl

bazm-ārā ā.ina-dar-ā.ina

zard phūloñ par thiraktī titliyoñ kā

pairahan piilā sunahrā

ghaas par lahrā.e TiDDoñ kī harī dhānī qabā

rañgrezī dahr ke is daur kī

guzrā hai jo

rafta-ziyād

jab na thā insān kā mazkūra ashiyā meñ shumār

is taraf pahle kabhī dekhā na thā

ab jo dekhā hai to jaise

phir sirā āġhāz kā haath aa rahā hai

ye vahī anjām hai

dhaḌkā thā jis kā

hast-o-būd insān kī jab dahr meñ thī beshanāḳht

rahīn-ḳhāna

ḳhānamāñ-barbād ai bāñg-e-rahīl

tū ne dekhā hai kabhī

shaffāf uthle pāniyoñ kī tah meñ

mūñge ke jazīroñ kā dayār

vo samay kī niiv thī garm-o-gudāz

muddatoñ ta.amīr kī dīvār apnī

saada dil āñgan ne jis par

ye tabassum bhī kise miltā hai

jis ke soz se

ma.adan zar-e-gul kā pighaltā hī rahā

sāñchoñ meñ Dhaltā hī rahā

nasloñ kā faulād-e-garāñ

ḳhānamāñ-barbād ai bāñg-e-rahīl

zanān-e-misr

ek ibrānī payambar-zāda ko

ham ne jis ghar kā bharam rakhne kī ḳhātir

dāḳhil-e-zindāñ kiyā thā

kaise āḳhir us ko bait-e-ankabūt

maan leñ ham be-dalīl

vo haqīqat kī siloñ par

qaa.em ik ta.amīr kaisī thī

vo saqf-o-bām kaise the tujhe ma.alūm kyā

mahfileñ ārāsta pairāsta

jin kā tahammul sehr-kār

ḳhushbuoñ ke tāne-bāne bunñe vaale

mujmiroñ kī dhvaniyoñ se aaj bhī

mahke mahke haiñ tamaddun ke dayār

aaj bhī āsār dete haiñ gavāhī

naqsh-kārī kaisī anmiT thī vo

qismat kī lakīroñ se juḌī

ham ne ibrānī payambar-zādoñ se

patthar tarashvā.e ki ba.ad-az-marg bhī

pāya-e-ahrām meñ pinhāñ rahe ghar kī asaas

la.al-o-gauhar ḳhazāne

shahd-o-gandum se zurūf uble hue

taḳht-o-tāj-o-mohr-e-shāhī ke nigahbāñ

harba-hā-e-āhan-o-faulād

aur daste ġhulāmān-e-javāñ ke

kāhinoñ kī phūñk

hāmānoñ kī tadbīr-e-siyāsat meñ zahr-e-halāhil

pāsbānī meñ magan

so rahe haiñ an-ginat fir.aun

ai bād-e-sabā āhista chal

bāñg-e-rahīl

shevan tauq-o-salāsil

kāḳh-o-aivāñ se nikal kar

kū-ba-kū

yam-ba-yam dariyā-ba-dariyā jū-ba-jū

vo bisāt-e-raqs darbāroñ se ho kar

phailtī daftar-ba-daftar

anjuman-dar-anjuman ghar ghar bichhī

pattī pattī meñ utar aa.ī thī kaḌvāhaT

jaḌeñ thiiñ niim kī

ai rahīn-ḳhāna

kyā tujh ko sunā.ī dī kabhī

is duā kī guuñj

jis ko sun ke vo tasvīr-e-āb

niil

shāhī qasr kī

Duubī Duubī sīḌhiyoñ se duur

ThāTheñ mārtā

dariyā-e-nā-paida kanār

ai tamasha-gah-e-alam roe tu

mah-e-nau

hum dekhte tujh ko kis arman se

dekhte hi dekhte tahlil ho jaana tera

dekhte hum

phir bhi tujh ko DhunD rahte usi

sune ufuq mein ai hilal

waqt ke dariya mein mahi-gir ne

Dala hai jal

kis liye sahil ka patthar ban ke

mahi-gir

baiThe hon yahan

thah mein Dube hue wo mehr-o-mah

ban chuke honge ghubar-e-raegan

ya tamasha sina-e-shamshir se bahar dam-e-shamshir ka

maujon mein bahta

dekhte rahte ho tum

be-sabab aankhon se kab

yun mae chhalakti hai

nashat did ki

kaun ho tum

aur gagar apni le jati ho

kis aangan ki aur

wo suhana sa ujala

jhumta sagar ke par

gul-badaman ek aangan sham ke tare ka hai

mera nahin

wo ghana ban bhi purana aashram hai

jhilmilati os ka

mera nahin

main to gunge KHak-dan ki

an-kahi

ai ajnabi

an-kahi se kahni sunni tak pahunchna

sahal kab hai

darmiyan hail milega

ek KHala-e-be-karan

soch lo

hai waqt ab bhi

warna phir ai

banu-e-masum-o-zirak

ranjishen kitni khaDi hain rah mein

phir na sahil tha

na wo sahil ka patthar

jo nazar aaya

wo ta-hadd-e-nazar phaila hua

ek pur-ashob-o-pur-asrar

bahr-e-na-paida kanar

hum ne insan ka janm paya

sitare ga rahe the

kis amal ke ijra mein

paya sitaro

tum ne insan ka janm

hum to insan ke janm mein bhi sitare hi rahe

be-karan nilahaTon mein

ru jhamak uThti hai rah rah kar

ana

kahkashan-dar-kahkashan bikhre sawabit

aur sayyaron ke beach

fasle jazb-o-kashish ke

un ki paimuda haden

baDhte baDhte zari daim

banatunnash ki

ghaTte ghaTte warta dam-e-fana

dhum ketu be-muhaari mein magan

ek jhaala sa baras kar khul gaya chingariyon ka

kitni tahziben shahabi TimTima kar bujh gain

nagriyan babul si mahwash

shahpar-e-afrashtagan uljhe hue

jin ki surili tan hain

un ki gharqabi kahani hai

purani bhi nai bhi

un ki apni aatma ki thah se

umDe hue tufan hain

apni fitrat ke tajalli-zar se

TuT kar girte kawakib

ja samate hain KHuda jaane kahan

ja-ba-ja azdarahan kale dahane

jin ka munh sab kuchh nigal kar phir khula

der kitni ho chuki

tab kahin ja kar wo ek din ye samajh pae

ki sannaTa

KHud apne dil ke andar ka tha

bahar ka na tha

rustgar az-panja-e-bedardi-e-lail-o-nahaar

band aankhon ke nagar mein

kaif-e-alamgir ka arman mila

jis se wawaila nashebon ka na Takraya kabhi

wo auj-e-baam

sarsari us se guzar jaane mein pinhan aafiyat

ai rah-naward

ai nazar-war ai dil-asa

rauzan-e-zulmat hast-o-bud

ai paik-e-jahan-paima KHizar

kil si dahliz mein paiwast ye kaisi chamak hai

dhul ajram-e-falak ki

gutthiyan mauhum si rishton ki ye kaisi hain

suljhana nahin zinhaar warna

hu ka aalam hai namudan ki

sulajh jaane ke baad

sabza-e-naurasta ke parde mein sare unch nich

paTte rahne ke ai aanand

bahte paniyon ki aatma

kis ke hain ye ustuKHwan

malbe mein Dhalte ustuKHwan

KHak-e-uftada ki agli aur pichhli

har parat ke

be-zaban tamir-e-kar

mehrban sa ek tabassum

aur shaista ishaara ghar ki jaanib

jaise ghar ke baam-o-dar par ho nawishta

har sawal-e-na-shakeba ka jawab

phir udhar dekha to sab kuchh

dasht-e-iKHfa main tha adim

ghaar kuTiyaen machanen

ghar gharaunde

sare aasar-o-mazahir

gunj mein apni samo kar

le uDi bang chil

wo safar be-sang-e-mil

ek adhure aasmani KHwab ka

un ki aankhon mein KHumar

zeb-tan gard-o-ghubar

jaise miTTi mein sani

dhaDkanen dharti ki

nar-nari ki tajsimon mein aalam-e-ashkar

aur phir uftad par uftad

dur uftadgi

shahrahen na-tarashida sabhi KHushki teri ki

aur kaghaz bhi pata ka gum-shuda

be-KHabar nikle hawa-e-dasht ke jhonke sabhi

aur sahal-angar tair bhi na de pae suragh

hai kahan arfat

wo ek wadi-e-dur-daraaz

rah mein aankhen bichhae

phul nargis ke mile

rah mein mahke gulab aur rah mein lale khile

did ki lekin unhen raftar fursat bhi to de

munkashif karti hui

be-nam jal-pariyon ko

gahre paniyon mein ek lamhati tarang

be-nishan ban-basiyon par

Tahniyon mein aas ke maman kisi

bhule bhaTke zamzama ki rah takte

dwar khole jagte hain

raat kali barshgali

jugnuon ki na-gahan yalghaar

phir gahra andhera

aur jibillat ki athah

shaktiyon ka

ban mein Dera

man mein Dera

sahilon ki ret mein saunpe hue

ek wadiat ki tarah hashraat-e-ab

KHol apne toDte hain

aur be-rahbari hi aahista-KHiram

apne man ki chandni mein

rengne lagte hain

shor-e-ab bhi kahte hain wo

ek samt hai

ek samt hai sehr-e-kashish bhi

sab dishaen na-gahan

ek sath bharti hain hunkara

bhulne lagte hain jab masum zaer

jal disha

kitne KHun-alud panje

kitne KHanjar ghat mein hain

phir bhi jari yatra

wo hazar be-barg-o-saman

ghar KHas-o-KHashak ki rachna adhuri

jis mein fitrat

jhankti rahti ki dekhe

apne aain to ufuq ka jamal

bazm-ara aaina-dar-aina

zard phulon par thirakti titliyon ka

pairahan pila sunahra

ghas par lahrae TiDDon ki hari dhani qaba

rangrezi dahr ke is daur ki

guzra hai jo

rafta-ziyaad

jab na tha insan ka mazkura ashiya mein shumar

is taraf pahle kabhi dekha na tha

ab jo dekha hai to jaise

phir sira aaghaz ka hath aa raha hai

ye wahi anjam hai

dhaDka tha jis ka

hast-o-bud insan ki jab dahr mein thi beshanaKHt

rahin-KHana

KHanaman-barbaad ai bang-e-rahil

tu ne dekha hai kabhi

shaffaf uthle paniyon ki tah mein

munge ke jaziron ka dayar

wo samay ki niw thi garm-o-gudaz

muddaton tamir ki diwar apni

sada dil aangan ne jis par

ye tabassum bhi kise milta hai

jis ke soz se

madan zar-e-gul ka pighalta hi raha

sanchon mein Dhalta hi raha

naslon ka faulad-e-garan

KHanaman-barbaad ai bang-e-rahil

zanan-e-misr

ek ibrani payambar-zada ko

hum ne jis ghar ka bharam rakhne ki KHatir

daKHil-e-zindan kiya tha

kaise aaKHir us ko bait-e-ankabut

man len hum be-dalil

wo haqiqat ki silon par

qaem ek tamir kaisi thi

wo saqf-o-baam kaise the tujhe malum kya

mahfilen aarasta pairasta

jin ka tahammul sehr-kar

KHushbuon ke tane-bane bunne wale

mujmiron ki dhwaniyon se aaj bhi

mahke mahke hain tamaddun ke dayar

aaj bhi aasar dete hain gawahi

naqsh-kari kaisi anmiT thi wo

qismat ki lakiron se juDi

hum ne ibrani payambar-zadon se

patthar tarashwae ki baad-az-marg bhi

paya-e-ahram mein pinhan rahe ghar ki asas

lal-o-gauhar KHazane

shahd-o-gandum se zuruf uble hue

taKHt-o-taj-o-mohr-e-shahi ke nigahban

harba-ha-e-ahan-o-faulad

aur daste ghulaman-e-jawan ke

kahinon ki phunk

hamanon ki tadbir-e-siyasat mein zahr-e-halahil

pasbani mein magan

so rahe hain an-ginat firaun

ai baad-e-saba aahista chal

bang-e-rahil

shewan tauq-o-salasil

kaKH-o-aiwan se nikal kar

ku-ba-ku

yam-ba-yam dariya-ba-dariya ju-ba-ju

wo bisat-e-raqs darbaron se ho kar

phailti daftar-ba-daftar

anjuman-dar-anjuman ghar ghar bichhi

patti patti mein utar aai thi kaDwahaT

jaDen thin nim ki

ai rahin-KHana

kya tujh ko sunai di kabhi

is dua ki gunj

jis ko sun ke wo taswir-e-ab

nil

shahi qasr ki

Dubi Dubi siDhiyon se dur

ThaThen marta

dariya-e-na-paida kanar