ek sitaron bhari raat

ik sitāroñ se bharī ḳhvāb sī mahkār sī raat

lawn meñ bikhrī huī chāñd kī bekal kirneñ

vaqt sākin thā yā lamha thā koī Thahrā huā

zehn meñ simTī huī soch ubharne sī lagī

aañkh jhapkī to maiñ kyā dekhtī huuñ

vus.at-e-shab pe vo chhāyā huā tanhā tanhā

mujh ko apnā sā lagā

merī jānib kisī baḌhte hue ik saa.e ne

mujh ko chauñkā sā diyā

mere aur chāñd ke mābain vo haa.il sā huā

pyaar āñkhoñ meñ bahut ḳhvāb sajā.e us ne

aur kuchh yaad nahīñ rasm mohabbat kī mujhe

phir usī lamhe mire zehn ke ik goshe meñ

ek anjāne se ehsās ne añgḌā.ī lī

milne vaale ke bichhaḌne kī ghaḌī baaqī hai

in rusūmāt kī ik aur kaḌī baaqī hai

aur aisā hī huā

phir vahī chāñd vahī maiñ huuñ vahī dard kī raat

ek sitaron se bhari KHwab si mahkar si raat

lawn mein bikhri hui chand ki bekal kirnen

waqt sakin tha ya lamha tha koi Thahra hua

zehn mein simTi hui soch ubharne si lagi

aankh jhapki to main kya dekhti hun

wusat-e-shab pe wo chhaya hua tanha tanha

mujh ko apna sa laga

meri jaanib kisi baDhte hue ek sae ne

mujh ko chaunka sa diya

mere aur chand ke mabain wo hail sa hua

pyar aankhon mein bahut KHwab sajae us ne

aur kuchh yaad nahin rasm mohabbat ki mujhe

phir usi lamhe mere zehn ke ek goshe mein

ek anjaane se ehsas ne angDai li

milne wale ke bichhaDne ki ghaDi baqi hai

in rusumat ki ek aur kaDi baqi hai

aur aisa hi hua

phir wahi chand wahi main hun wahi dard ki raat