ek udhaar si zindagi

tujh ko kho kar bachā hī kyā thā zindagī meñ khone ke liye

bas ik udhār sī zindagī jī rahā thā

terī yādoñ kā qarz liye

muaaf karnā terī yādoñ ko ham yuuñ hī bulā lete haiñ jis se ki ye sāñseñ chal sakeñ

shāyad tū bhuul ga.ī jo ik roz tū ne kahā thā ki jab zindagī vīrāniyoñ ke daur se guzarne lage

to

tū mujhe yaad kar lenā

muaaf karnā aaj phir tujhe itnā hī yaad kiyā

itnā hī terā naam liyā

jitnā har pal har ghaḌī har-vaqt maiñ tujhe yaad kiyā kartā thā

tujhe yaad hai na

jab āsmān meñ koī taarā TūTtā thā to jaldī se āñkheñ band karke duā māñgtī thī aur mujhe bhī aisā karne ko kahtī thī

par muaaf zarūr karnā aaj maiñ ne TūTte taare ko dekh kar koī duā nahīñ māñgī

kyūñki aaj maiñ tanhā thā

vahī khulā āsmān

vahī chamakte sitāre aur vahī maiñ thā

par tum nahīñ thī

tujh ko kho kar bacha hi kya tha zindagi mein khone ke liye

bas ek udhaar si zindagi ji raha tha

teri yaadon ka qarz liye

muaf karna teri yaadon ko hum yun hi bula lete hain jis se ki ye sansen chal saken

shayad tu bhul gai jo ek roz tu ne kaha tha ki jab zindagi viraniyon ke daur se guzarne lage

to

tu mujhe yaad kar lena

muaf karna aaj phir tujhe itna hi yaad kiya

itna hi tera nam liya

jitna har pal har ghaDi har-waqt main tujhe yaad kiya karta tha

tujhe yaad hai na

jab aasman mein koi tara TuTta tha to jaldi se aankhen band karke dua mangti thi aur mujhe bhi aisa karne ko kahti thi

par muaf zarur karna aaj main ne TuTte tare ko dekh kar koi dua nahin mangi

kyunki aaj main tanha tha

wahi khula aasman

wahi chamakte sitare aur wahi main tha

par tum nahin thi