ilm-e-sina

abbu-jān aksar kahte the

sach ko zarā mushkil aatī hai

fat.h magar mil jaatī hai

jaise bhī hālāt huuñ bad-tar

kisī ke aage jhuknā mat

zehn kā saudā karnā mat

ammī kab pīchhe rahtī thiiñ

vo bhī hamesha kahtī thiiñ

beTā dīn-o-maz.hab ko aur umda aḳhlāq ko tum

ammī jaan sā pyārā jaano lekin jhuuT aur makr fareb

bad-ahdī aur dil-āzārī

un se duurī rakhnā tum

yaad haiñ mujh ko vo bāteñ bhī maktab meñ jo aaġhā the

baḌe hī pyaar aur baḌī jatan se

ujle kāġhaz jaise dil pe

ham sab ke ye likhte the

mehnat diyānat achchhī bātoñ jur.at aur haq-goī ko

ilm kā hāsil merī izzat ghar vāloñ kī daulat samjho

bhayyā jo kam kam dikhte the

gaañv gaañv phirte rahte the

gande-ma.de logoñ ko bhūke-nañge bachchoñ ko

jaane kyā kyā sikhlāte the ham jaisā hī batlāte the

nahīñ kisī se nafrat karnā āzādī pe jaañ de denā

aur bhī kuchh kahte the vo

ye sab bāteñ bachpan kī haiñ

lekin ab to baap bhī huuñ maiñ

maktab ke aaġhā kī tarah se bachchoñ kā ustāz bhī huuñ maiñ

ammī jaan kī saarī bāteñ ab bhī mere zehn meñ haiñ

bhayyā ke ādarshoñ ko kabhī bhulā na paayā maiñ

par ab jo maiñ dekh rahā huuñ samāj meñ baste logoñ ko

ammī abbū kī bātoñ kā jo jo natīja bhog rahā huuñ

aaġhā ke anmol se motī dekh ke sab hañste haiñ log

bhayyā ke ādarsh ko bhī sab marā marā sā kahte haiñ

phir kaise ye saarī chīzeñ meñ apne bachchoñ ko duuñ

aisī gahrī tārīkī meñ ammī abbū aaġhā ke

haq aḳhlāq aur gyaan ke jugnū raushnī kyā phailā.eñge

yā ghup añdhere ke ajgar

chun chun ke unheñ khā jā.eñge

jab jab sochtā huuñ ye sab

dubidhā meñ paḌ jaatā huuñ

tab haule se dil meñ utar kar

ammī jaan kī rūh-e-muqaddas

chup ke se kah jaatī hai

beTe jab abbū ne maiñ ne

bhayyā aur aaġhā sāhab ne

apnī amānat dī thī tujh ko

tab bhī aise log the baste

tab bhī aisā ghup añdherā

aisī hī tārīkī thī

abbu-jaan aksar kahte the

sach ko zara mushkil aati hai

fath magar mil jati hai

jaise bhi haalat hun bad-tar

kisi ke aage jhukna mat

zehn ka sauda karna mat

ammi kab pichhe rahti thin

wo bhi hamesha kahti thin

beTa din-o-mazhab ko aur umda aKHlaq ko tum

ammi jaan sa pyara jaano lekin jhuT aur makr fareb

bad-ahdi aur dil-azari

un se duri rakhna tum

yaad hain mujh ko wo baaten bhi maktab mein jo aagha the

baDe hi pyar aur baDi jatan se

ujle kaghaz jaise dil pe

hum sab ke ye likhte the

mehnat diyanat achchhi baaton jurat aur haq-goi ko

ilm ka hasil meri izzat ghar walon ki daulat samjho

bhayya jo kam kam dikhte the

ganw ganw phirte rahte the

gande-made logon ko bhuke-nange bachchon ko

jaane kya kya sikhlate the hum jaisa hi batlate the

nahin kisi se nafrat karna aazadi pe jaan de dena

aur bhi kuchh kahte the wo

ye sab baaten bachpan ki hain

lekin ab to bap bhi hun main

maktab ke aagha ki tarah se bachchon ka ustaz bhi hun main

ammi jaan ki sari baaten ab bhi mere zehn mein hain

bhayya ke aadarshon ko kabhi bhula na paya main

par ab jo main dekh raha hun samaj mein baste logon ko

ammi abbu ki baaton ka jo jo natija bhog raha hun

aagha ke anmol se moti dekh ke sab hanste hain log

bhayya ke aadarsh ko bhi sab mara mara sa kahte hain

phir kaise ye sari chizen mein apne bachchon ko dun

aisi gahri tariki mein ammi abbu aagha ke

haq aKHlaq aur gyan ke jugnu raushni kya phailaenge

ya ghup andhere ke ajgar

chun chun ke unhen kha jaenge

jab jab sochta hun ye sab

dubidha mein paD jata hun

tab haule se dil mein utar kar

ammi jaan ki ruh-e-muqaddas

chup ke se kah jati hai

beTe jab abbu ne main ne

bhayya aur aagha sahab ne

apni amanat di thi tujh ko

tab bhi aise log the baste

tab bhi aisa ghup andhera

aisi hi tariki thi