ilm

sonā chāñdī aur na gauhar

sab se behtar ilm kā zevar

ilm kī daulat hai vo daulat

jitnī bāñTo utnī barakat

is ko koī chor na paa.e

kaise koī is ko churā.e

ilm hameñ jiinā sikhlā.e

bhale bure kā farq batā.e

paas nahīñ jo ilm kā jauhar

gauhar patthar sab haiñ barābar

ilm se ho zehnoñ meñ ujālā

añdhiyāroñ kā muñh ho kaalā

ilm hai ruuh aur jism hai insāñ

ruuh nahīñ to jism hai be-jāñ

ilm se raushan dil hotā hai

ilm ḳhud ik manzil hotā hai

bachcho ilm se muñh mat moḌo

is daulat ko kabhī na chhoḌo

apnā to 'jauhar' ye yaqīñ hai

ilm nahīñ to kuchh bhī nahīñ hai

sona chandi aur na gauhar

sab se behtar ilm ka zewar

ilm ki daulat hai wo daulat

jitni banTo utni barakat

is ko koi chor na pae

kaise koi is ko churae

ilm hamein jina sikhlae

bhale bure ka farq batae

pas nahin jo ilm ka jauhar

gauhar patthar sab hain barabar

ilm se ho zehnon mein ujala

andhiyaron ka munh ho kala

ilm hai ruh aur jism hai insan

ruh nahin to jism hai be-jaan

ilm se raushan dil hota hai

ilm KHud ek manzil hota hai

bachcho ilm se munh mat moDo

is daulat ko kabhi na chhoDo

apna to 'jauhar' ye yaqin hai

ilm nahin to kuchh bhi nahin hai