iltibas

hameñ kis ne dhakelā is taraf

un nuur barsātī huī niilī fazāoñ se

unnābī surḳh phūloñ se aTī

maḳhmal ridā.ī sar-zamīnoñ se

kanār-e-ābjū se

vo jahāñ sayyāl chāñdī bah rahī thī

hameñ kis ne jagāyā

gungunāte ḳhvāb se

jis meñ kisī lahn-e-musalsal kī

hasīñ takrār se mīThe madhur naġhme ubharte the

vo jaadū sī jakaḌ qadmoñ meñ āñkhoñ meñ

samā.at meñ

hameñ kis ne haTāyā faiz-parvar reg-zāroñ se

vo jin kī ret par man kī farozāñ raushnī se

un sarāboñ kī chhabī bantī

vo jin kī tishnagī se ruuh tak sairāb rahtī thī

hameñ kis ne

hamein kis ne dhakela is taraf

un nur barsati hui nili fazaon se

unnabi surKH phulon se aTi

maKHmal ridai sar-zaminon se

kanar-e-abju se

wo jahan sayyal chandi bah rahi thi

hamein kis ne jagaya

gungunate KHwab se

jis mein kisi lahn-e-musalsal ki

hasin takrar se miThe madhur naghme ubharte the

wo jadu si jakaD qadmon mein aankhon mein

samaat mein

hamein kis ne haTaya faiz-parwar reg-zaron se

wo jin ki ret par man ki farozan raushni se

un sarabon ki chhabi banti

wo jin ki tishnagi se ruh tak sairab rahti thi

hamein kis ne