iltimas

aa.iye vaqt ke chehre se uThā.eñ ye naqāb

aa.iye apne raqīboñ se mulāqāt kareñ

aa.iye pyaar kī tahzīb kā unvāñ ban kar

ik na.e ahd kī taḳhlīq kī kuchh baat kareñ

aa.iye is kaḌī dīvār-e-sitam ko Dhā.eñ

sab meñ taqsīm mohabbat hī kī sauġhāt kareñ

baiTh ke dil ke darīchoñ ko zarā kholeñ to

khulte mausam kī havāoñ ko giraftār kareñ

jo na sochā thā kabhī ham ne vo socheñ be-shak

mil ke chalne ke liye zehn ko tayyār kareñ

aag nafrat kī jalātī hai ḳhushī ke āñgan

phuul ḳhushbū se zamīñ ko hasīñ gulzār kareñ

faisla ab na huā jang se be-zārī kā

to kabhī amn kā māhaul na hogā taarī

aag bārūd kī bū aa.egī is miTTī se

tank topoñ meñ basar umr ye hogī saarī

aaiye waqt ke chehre se uThaen ye naqab

aaiye apne raqibon se mulaqat karen

aaiye pyar ki tahzib ka unwan ban kar

ek nae ahd ki taKHliq ki kuchh baat karen

aaiye is kaDi diwar-e-sitam ko Dhaen

sab mein taqsim mohabbat hi ki saughat karen

baiTh ke dil ke darichon ko zara kholen to

khulte mausam ki hawaon ko giraftar karen

jo na socha tha kabhi hum ne wo sochen be-shak

mil ke chalne ke liye zehn ko tayyar karen

aag nafrat ki jalati hai KHushi ke aangan

phul KHushbu se zamin ko hasin gulzar karen

faisla ab na hua jang se be-zari ka

to kabhi amn ka mahaul na hoga tari

aag barud ki bu aaegi is miTTi se

tank topon mein basar umr ye hogi sari