iltimas

apne āñchal pe sitāroñ se mirā naam na likh

maiñ tirā ḳhvāb huuñ palkoñ meñ sajā le mujh ko

merī fitrat hai mohabbat kī machaltī huī lahar

apne siine ke samundar meñ chhupā le mujh ko

zindagī chāñdnī rātoñ kā hasīñ ruup liye

sañg-e-marmar ke jazīroñ meñ utar aa.ī hai

ik tire dast-e-hinā.ī ko chhuā hai jab bhī

saat rañgoñ kī fazā zehn meñ lahrā.ī hai

tere hañste hue hoñToñ kā pighaltā huā lams

gungunātā hai mirī ruuh kī tanhā.ī meñ

kisī shīshe kisī sāġhar kisī sahbā meñ kahāñ

vo jo mastī hai tire jism kī añgḌā.ī meñ

apnī abreshmīñ zulfoñ ke ghanere saa.e

merī nīndoñ ke shabistānoñ meñ lahrāne de

mujh ko hañste hue ḳhvāboñ kā muqaddar ban kar

apne hāthoñ kī lakīroñ meñ samā jaane de

apne aanchal pe sitaron se mera nam na likh

main tera KHwab hun palkon mein saja le mujh ko

meri fitrat hai mohabbat ki machalti hui lahar

apne sine ke samundar mein chhupa le mujh ko

zindagi chandni raaton ka hasin rup liye

sang-e-marmar ke jaziron mein utar aai hai

ek tere dast-e-hinai ko chhua hai jab bhi

sat rangon ki faza zehn mein lahrai hai

tere hanste hue honTon ka pighalta hua lams

gungunata hai meri ruh ki tanhai mein

kisi shishe kisi saghar kisi sahba mein kahan

wo jo masti hai tere jism ki angDai mein

apni abreshmin zulfon ke ghanere sae

meri nindon ke shabistanon mein lahrane de

mujh ko hanste hue KHwabon ka muqaddar ban kar

apne hathon ki lakiron mein sama jaane de