imroz

abad ke samundar kī ik mauj jis par mirī zindagī kā kañval tairtā hai

kisī an-sunī dā.imī rāgnī kī koī taan āzurda āvāra barbād

jo dam bhar ko aa kar mirī uljhī uljhī sī sāñsoñ ke sañgīt meñ Dhal ga.ī hai

zamāne kī phailī huī be-karāñ vus.atoñ meñ ye do chaar lamhoñ kī mī.ād

tulū o ġhurūb-e-mah-o-mehr ke jāvedānī tasalsul kī do chaar kaḌiyāñ

ye kuchh thartharāte ujāloñ kā rūmān ye kuchh sansanāte añdheroñ kā qissa

ye jo kuchh ki mere zamāne meñ hai aur ye jo kuchh ki us ke zamāne meñ maiñ huuñ

yahī merā hissa azal se abad ke ḳhazānoñ se hai bas yahī merā hissa

mujhe kyā ḳhabar vaqt ke devtā kī hasīñ rath ke pahiyoñ tale pis chuke haiñ

muqaddar ke kitne khilaune zamānoñ ke hañgāme sadiyoñ ke sad-hā hayūle

mujhe kyā ta.alluq merī āḳhirī saañs ke ba.ad bhī dosh-e-gītī pe machle

mah o saal ke lā-zavāl āb-shār-e-ravāñ kā vo āñchal jo tāroñ ko chhū le

magar aah ye lamha-e-muḳhtasar jo mirī zindagī merā zād-e-safar hai

mire saath hai mere bas meñ hai merī hathelī pe hai ye labā-lab pyāla

yahī kuchh hai le de ke mere liye is ḳharābāt-e-shām-o-sahar meñ yahī kuchh

ye ik mohlat-e-kāvish-e-dard-e-hastī ye ik fursat-e-koshish-e-āh-o-nāla

ye sahbā-e-imroz jo sub.h kī shāhzādī kī mast añkhḌiyoñ se Tapak kar

ba-daur-e-hayāt aa ga.ī hai ye nannhī sī chiḌiyāñ jo chhat meñ chahakne lagī haiñ

havā kā ye jhoñkā jo mere darīche meñ tulsī kī Tahnī ko larzā gayā hai

paḌosan ke āñgan meñ paanī ke nalke pe ye chūḌiyāñ jo chhanakne lagī haiñ

ye duniya-e-imroz merī hai mere dil-e-zār kī dhaḌkanoñ kī amiiñ hai

ye ashkoñ se shādāb do chaar sub.heñ ye aahoñ se māmūr do chaar shāmeñ

inhī chilmanoñ se mujhe dekhnā hai vo jo kuchh ki nazroñ kī zad meñ nahīñ hai

abad ke samundar ki ek mauj jis par meri zindagi ka kanwal tairta hai

kisi an-suni daimi ragni ki koi tan aazurda aawara barbaad

jo dam bhar ko aa kar meri uljhi uljhi si sanson ke sangit mein Dhal gai hai

zamane ki phaili hui be-karan wusaton mein ye do chaar lamhon ki miad

tulu o ghurub-e-mah-o-mehr ke jawedani tasalsul ki do chaar kaDiyan

ye kuchh thartharaate ujalon ka ruman ye kuchh sansanate andheron ka qissa

ye jo kuchh ki mere zamane mein hai aur ye jo kuchh ki us ke zamane mein main hun

yahi mera hissa azal se abad ke KHazanon se hai bas yahi mera hissa

mujhe kya KHabar waqt ke dewta ki hasin rath ke pahiyon tale pis chuke hain

muqaddar ke kitne khilaune zamanon ke hangame sadiyon ke sad-ha hayule

mujhe kya talluq meri aaKHiri sans ke baad bhi dosh-e-giti pe machle

mah o sal ke la-zawal aab-shaar-e-rawan ka wo aanchal jo taron ko chhu le

magar aah ye lamha-e-muKHtasar jo meri zindagi mera zad-e-safar hai

mere sath hai mere bas mein hai meri hatheli pe hai ye laba-lab pyala

yahi kuchh hai le de ke mere liye is KHarabaat-e-sham-o-sahar mein yahi kuchh

ye ek mohlat-e-kawish-e-dard-e-hasti ye ek fursat-e-koshish-e-ah-o-nala

ye sahba-e-imroz jo subh ki shahzadi ki mast ankhDiyon se Tapak kar

ba-daur-e-hayat aa gai hai ye nannhi si chiDiyan jo chhat mein chahakne lagi hain

hawa ka ye jhonka jo mere dariche mein tulsi ki Tahni ko larza gaya hai

paDosan ke aangan mein pani ke nalke pe ye chuDiyan jo chhanakne lagi hain

ye duniya-e-imroz meri hai mere dil-e-zar ki dhaDkanon ki amin hai

ye ashkon se shadab do chaar subhen ye aahon se mamur do chaar shamen

inhi chilmanon se mujhe dekhna hai wo jo kuchh ki nazron ki zad mein nahin hai