jashn-e-azadi

āzādī kā jashn manāo

giit ḳhushī ke mil ke gaao

har har gaam pe ishrat-e-manzil

jaise lailā zīnat-e-mahmil

sāġhar raqsāñ mahfil mahfil

shauq hai daur-e-jām meñ shāmil

ḳhuub piyo aur ḳhuub pilāo

āzādī kā jashn manāo

ek hī desh ke basne vaale

hind kī azmat ke rakhvāle

maut se Takrā.eñ vo jiyāle

duniyā un se dars-e-vafā le

ḳhalq ko ye paiġhām sunāo

āzādī kā jashn manāo

lekin tum ko ye bhī ḳhabar hai

saarī jantā nauhagar hai

ik pal jiinā bhī dūbhar hai

saañs nahīñ hai ik nashtar hai

kuchh un ko rāhat pahuñchāo

āzādī kā jashn manāo

ye fāqoñ kī maarī jantā

bebas aur dukhiyārī jantā

desh kī pyārī pyārī jantā

bhārat kī balihārī jantā

jantā ke dukh-dard miTāo

āzādī ke jashn manāo

daur meñ yuuñ aa.e paimāna

jhuum uThe har ik dīvāna

chheḌ de mutrib koī tarāna

aa jaa.e ishrat kā zamāna

aao diloñ ke jot jagāo

āzādī kā jashn manāo

aazadi ka jashn manao

git KHushi ke mil ke gao

har har gam pe ishrat-e-manzil

jaise laila zinat-e-mahmil

saghar raqsan mahfil mahfil

shauq hai daur-e-jam mein shamil

KHub piyo aur KHub pilao

aazadi ka jashn manao

ek hi desh ke basne wale

hind ki azmat ke rakhwale

maut se Takraen wo jiyale

duniya un se dars-e-wafa le

KHalq ko ye paigham sunao

aazadi ka jashn manao

lekin tum ko ye bhi KHabar hai

sari janta nauhagar hai

ek pal jina bhi dubhar hai

sans nahin hai ek nashtar hai

kuchh un ko rahat pahunchao

aazadi ka jashn manao

ye faqon ki mari janta

bebas aur dukhiyari janta

desh ki pyari pyari janta

bhaarat ki balihaari janta

janta ke dukh-dard miTao

aazadi ke jashn manao

daur mein yun aae paimana

jhum uThe har ek diwana

chheD de mutrib koi tarana

aa jae ishrat ka zamana

aao dilon ke jot jagao

aazadi ka jashn manao