jashn-e-azadi

jashn-e-āzādī-e-jamhūr manā.eñ logo

goshe goshe meñ musāvāt kā charchā kar deñ

koī bhūkā na rahe koī bhī nangā na rahe

aaj har fard kī in.aam se jholī bhar deñ

apne kirdār ko is tarah nikhāreñ ham log

dushman-e-jāñ bhī nigāheñ na uThāne paa.e

amn ke phuul se rāhoñ ko sajā deñ itnā

zaḳhm kāñToñ kā koī paañv na khāne paa.e

buġhz-o-nafrat kā añdherā na rahe dhartī par

ham mohabbat ke charāġhoñ se charāġhāñ kar deñ

adl-o-insāf kī kirnoñ ko farozāñ kar ke

haq-parastī ko zamāne pe numāyāñ kar deñ

ham agar apne masā.il kā koī hal DhūñDeñ

kitne uljhe hue zehnoñ ko sukūñ mil jaa.e

azm-o-himmat se agar kaam le zehn-e-jamhūr

dahr ke sho.ala-mizājoñ kā jahāñ hil jaa.e

jashn-e-azadi-e-jamhur manaen logo

goshe goshe mein musawat ka charcha kar den

koi bhuka na rahe koi bhi nanga na rahe

aaj har fard ki inam se jholi bhar den

apne kirdar ko is tarah nikhaaren hum log

dushman-e-jaan bhi nigahen na uThane pae

amn ke phul se rahon ko saja den itna

zaKHm kanTon ka koi panw na khane pae

bughz-o-nafrat ka andhera na rahe dharti par

hum mohabbat ke charaghon se charaghan kar den

adl-o-insaf ki kirnon ko farozan kar ke

haq-parasti ko zamane pe numayan kar den

hum agar apne masail ka koi hal DhunDen

kitne uljhe hue zehnon ko sukun mil jae

azm-o-himmat se agar kaam le zehn-e-jamhur

dahr ke shoala-mizajon ka jahan hil jae