pandrah august

aaj hai pañdrah august qaum ke tehvār kā din

aaj ke din hī to āzād hue the ham log

kyoñ na is din ko masarrat ke liye vaqf rakheñ

haañ isī din to ġhulāmī kā fusūñ toḌā thā

kyoñ na is din ko rivāyat ke liye vaqf rakheñ

des meñ apne haiñ baaqī kuchh añdhere ab bhī

jehl-o-iflās ke saa.e haiñ ghanere ab bhī

des āzād hue kitne baras biit ga.e

kitnī shāmoñ ko mile haiñ na savere ab bhī

des ke amn nahīñ amn-e-jahāñ kī ḳhātir

haañ abhī aur abhī aur laḌeñge ham log

aaj ke din kī masarrat ke bhī ma.anī haiñ yahī

tāza-dam ho ke abhī aur baḌheñge ham log

aaj hai pandrah august qaum ke tehwar ka din

aaj ke din hi to aazad hue the hum log

kyon na is din ko masarrat ke liye waqf rakhen

han isi din to ghulami ka fusun toDa tha

kyon na is din ko riwayat ke liye waqf rakhen

des mein apne hain baqi kuchh andhere ab bhi

jehl-o-iflas ke sae hain ghanere ab bhi

des aazad hue kitne baras bit gae

kitni shamon ko mile hain na sawere ab bhi

des ke amn nahin amn-e-jahan ki KHatir

han abhi aur abhi aur laDenge hum log

aaj ke din ki masarrat ke bhi mani hain yahi

taza-dam ho ke abhi aur baDhenge hum log