infiradiyat

tumheñ ye uzr hai

tum ko jo dī ga.ī hai zamīñ

vo muḳhtasar hai bahut

jo bāzuoñ meñ sameTo to vo simaT jaa.e

isī liye ho tum ehsās-e-kam-tarī kā shikār

aur un ko kitnī irādat se dekhte ho

jinheñ

zamīñ milī hai hudūd-e-nigāh se bhī bahut duur duur phailī huī

suno

zamīñ kī vus.at to koī chiiz nahīñ

jo nasl aa.egī kal vo hadeñ na nāpegī

faqat ye dekhegī

ki jo latāfat-e-qalb-o-nazar yahāñ par hai

qarīb o duur kahīñ bhī nahīñ

kahīñ bhī nahīñ

tum apne kāñdhoñ pe apnā hī sar tulū karo

safar shurūa karo

tumhein ye uzr hai

tum ko jo di gai hai zamin

wo muKHtasar hai bahut

jo bazuon mein sameTo to wo simaT jae

isi liye ho tum ehsas-e-kam-tari ka shikar

aur un ko kitni iradat se dekhte ho

jinhen

zamin mili hai hudud-e-nigah se bhi bahut dur dur phaili hui

suno

zamin ki wusat to koi chiz nahin

jo nasl aaegi kal wo haden na napegi

faqat ye dekhegi

ki jo latafat-e-qalb-o-nazar yahan par hai

qarib o dur kahin bhi nahin

kahin bhi nahin

tum apne kandhon pe apna hi sar tulu karo

safar shurua karo