inna-lillahi-wa-inna-ilaihi-raje’un

ek murda thā jise maiñ ḳhud akelā

apne kandhoñ par uThā.e

aaj āḳhir dafn kar ke aa gayā huuñ

bojh bhārī thā magar apnī rihā.ī ke liye

behad zarūrī thā uThā.ūñ

aur ghar se duur jā kar dafn kar duuñ

ye haqīqat thī ki koī vāhima thā

par ye badbū-dār lāsha

sirf mujh ko nazar aatā thā jaise

ek nādīda hai chhalāvā jo mire pīchhe lagā ho

mere kumbe ke sabhī afrād us kī

har jagah maujūdgī se be-ḳhabar the

sirf maiñ thā jise ye

TikTikī bāñdhe hue be-nūr āñkhoñ se hamesha ghūrtā thā

aaj jab maiñ

apne maazī kā ye murda dafn kar ke aa gayā huuñ

kyoñ ye lagtā hai ki merā

haal bhī jaise taḌaptā lamha lamha mar rahā ho

aur mustaqbil meñ jab ye haal bhī maazī banegā

mujh ko phir ik baar is murde ko kandhoñ par uThā.e

dafn karne ke liye jaanā paḌegā

ek murda tha jise main KHud akela

apne kandhon par uThae

aaj aaKHir dafn kar ke aa gaya hun

bojh bhaari tha magar apni rihai ke liye

behad zaruri tha uThaun

aur ghar se dur ja kar dafn kar dun

ye haqiqat thi ki koi wahima tha

par ye badbu-dar lasha

sirf mujh ko nazar aata tha jaise

ek nadida hai chhalawa jo mere pichhe laga ho

mere kumbe ke sabhi afrad us ki

har jagah maujudgi se be-KHabar the

sirf main tha jise ye

TikTiki bandhe hue be-nur aankhon se hamesha ghurta tha

aaj jab main

apne mazi ka ye murda dafn kar ke aa gaya hun

kyon ye lagta hai ki mera

haal bhi jaise taDapta lamha lamha mar raha ho

aur mustaqbil mein jab ye haal bhi mazi banega

mujh ko phir ek bar is murde ko kandhon par uThae

dafn karne ke liye jaana paDega