insan ki fariyaad

haañ ai masāf-e-hastī! mat pūchh mujh se kyā huuñ

ik arsa-e-balā huuñ ik luqma-e-fanā huuñ

majbūriyoñ ne Daalā gardan meñ merī phandā

ḳhud-karda-e-vafā huuñ jāñ-dāda-e-razā huuñ

sayyād hādse kā kartā hai merā pīchhā

murġh-e-burīda-par huuñ said-e-shikasta-pā huuñ

hai zaat merī majma.a saarī burā.iyoñ kā

kahne ko maiñ baḌā huuñ lekin bahut burā huuñ

āzādiyoñ kī mujh par tohmat hī hai sarāsar

maiñ qaidī-e-havas huuñ maiñ banda-e-havā huuñ

ik baat ho batā.ūñ ik dard ho sunā.ūñ

ro.uuñ bhalā kahāñ tak kab tak paḌā karāhūñ

kam-baḳht dil kuchh aisā maiñ saath le ke aayā

ik lamha jis ke hāthoñ duniyā meñ sukh na paayā

jo josh is meñ uTThā hālāt ne dabāyā

jo sho.ala is meñ bhaḌkā taqdīr ne bujhāyā

ummīd kā ye ġhuncha khilte kabhī na dekhā

ye aarzū kā paudā phaltā nazar na aayā

go is meñ maujzan thī qaum o vatan kī ulfat

lekin ġharaz ne is ko kuchh aur hī sikhāyā

hotī nahīñ rasā.ī ummīd ke ufuq tak

tūl-e-amal ne is ko ik jaal meñ phañsāyā

kī rahbarī ḳhirad ne har-chand rahnumā.ī

is juhd par bhī lekin khultī nahīñ sachchā.ī

paayā na maiñ ne ab tak maqsad kā apne sāhil

kī bahr-e-ma.arfat meñ din raat āshnā.ī

is justujū meñ maiñ ne kī sair-e-tūr-o-aiman

parbat ko ghar banāyā jangal se lau lagā.ī

mandir ko jā ke dekhā girjā meñ jā ke DhūñDā

masjid ko chhān maarā us kī na diid paa.ī

jogī kā ruup dhārā ban meñ kiyā guzārā

tan par bhabhūt mal kar dhūnī bahut ramā.ī

jap tap meñ umr apnī maiñ ne basar kī aksar

ban ban ke pīr-e-rāhib jā ḳhānqāh basā.ī

suufī bhī ban ke dekhā aur rind-e-be-riyā bhī

kar nāra-e-anā-al-haq ik khalbalī machā.ī

phirtī haiñ maarī maarī mushtāq-e-jalva āñkheñ

par ik jhalak se baḌh kar detā nahīñ dikhā.ī

uTh jā nazar se merī haañ ai hijāb-e-hastī

husn-e-azal nihāñ hai zer-e-naqāb-e-hastī

ye zindagī-e-insāñ ik ḳhvāb hai pareshāñ

bedārī-e-adam hai ta.abīr-e-ḳhvāb-e-hastī

dekheñ agar to kyūñ-kar ham jalva-e-ma.ārif

tū zulmat-e-nazar hai ai āftāb-e-hastī

taskīñ ko zahr-e-qātil āb-o-havā-e-ālam

rāhat kā dushman-e-jāñ har inqalāb-e-hastī

ai tishna-e-haqīqat dhoke meñ tū na aanā

ik dām-e-pur-ḳhatar hai mauj-e-sarāb-e-hastī

chāhe agar rihā.ī pesh-az-fanā fanā ho

pādāsh-e-jurm-e-hastī hai ye azāb-e-hastī

han ai masaf-e-hasti! mat puchh mujh se kya hun

ek arsa-e-bala hun ek luqma-e-fana hun

majburiyon ne Dala gardan mein meri phanda

KHud-karda-e-wafa hun jaan-dada-e-raza hun

sayyaad hadse ka karta hai mera pichha

murgh-e-burida-par hun said-e-shikasta-pa hun

hai zat meri majma sari buraiyon ka

kahne ko main baDa hun lekin bahut bura hun

aazadiyon ki mujh par tohmat hi hai sarasar

main qaidi-e-hawas hun main banda-e-hawa hun

ek baat ho bataun ek dard ho sunaun

roun bhala kahan tak kab tak paDa karahun

kam-baKHt dil kuchh aisa main sath le ke aaya

ek lamha jis ke hathon duniya mein sukh na paya

jo josh is mein uTTha haalat ne dabaya

jo shoala is mein bhaDka taqdir ne bujhaya

ummid ka ye ghuncha khilte kabhi na dekha

ye aarzu ka pauda phalta nazar na aaya

go is mein maujzan thi qaum o watan ki ulfat

lekin gharaz ne is ko kuchh aur hi sikhaya

hoti nahin rasai ummid ke ufuq tak

tul-e-amal ne is ko ek jal mein phansaya

ki rahbari KHirad ne har-chand rahnumai

is juhd par bhi lekin khulti nahin sachchai

paya na main ne ab tak maqsad ka apne sahil

ki bahr-e-marfat mein din raat aashnai

is justuju mein main ne ki sair-e-tur-o-aiman

parbat ko ghar banaya jangal se lau lagai

mandir ko ja ke dekha girja mein ja ke DhunDa

masjid ko chhan mara us ki na did pai

jogi ka rup dhaara ban mein kiya guzara

tan par bhabhut mal kar dhuni bahut ramai

jap tap mein umr apni main ne basar ki aksar

ban ban ke pir-e-rahib ja KHanqah basai

sufi bhi ban ke dekha aur rind-e-be-riya bhi

kar nara-e-ana-al-haq ek khalbali machai

phirti hain mari mari mushtaq-e-jalwa aankhen

par ek jhalak se baDh kar deta nahin dikhai

uTh ja nazar se meri han ai hijab-e-hasti

husn-e-azal nihan hai zer-e-naqab-e-hasti

ye zindagi-e-insan ek KHwab hai pareshan

bedari-e-adam hai tabir-e-KHwab-e-hasti

dekhen agar to kyun-kar hum jalwa-e-maarif

tu zulmat-e-nazar hai ai aaftab-e-hasti

taskin ko zahr-e-qatil aab-o-hawa-e-alam

rahat ka dushman-e-jaan har inqalab-e-hasti

ai tishna-e-haqiqat dhoke mein tu na aana

ek dam-e-pur-KHatar hai mauj-e-sarab-e-hasti

chahe agar rihai pesh-az-fana fana ho

padash-e-jurm-e-hasti hai ye azab-e-hasti