intibah

hamārī rasm hai

tum jānte ho

ka.ī sadiyoñ se ham ye kar rahe haiñ

baḌī mehnat se ḳhūn-e-dil jalā kar

sub.h-o-shab nuur āñkhoñ ko pilā kar

tarāshe sang-e-marmar saḳht patthar

aur un se ḳhūb-sūrat but banā.e

biThā kar mandiroñ meñ vediyoñ par

unheñ puujā unheñ sajde kiye haiñ

hamārī rasm hai

tum jānte ho

ki khanDit ho ga.ī hai mūrtī jab

to ham ne taj diyā

dekhā na muḌ kar

vo tanhā rah ga.e yug kī Dagar par

na koī bhakt na koī pujārī

na koī aartī

na dhuup dīpak

ziyāda se ziyāda ye huā hai

'ajā.ib ghar kī zīnat ho ga.e haiñ

hamārī rasm hī chūñki yahī hai

tumhārā farz hai

muhtāt rahnā

shikast-o-reḳht se ḳhud ko bachānā

sanam ho gosht ke zinda

yā patthar

ḳharāsh aa.ī agar ruḳh par badan par

to koī bhī tumheñ sajda na hogā

agar sālim rahe

sajde bhī hoñge

hamari rasm hai

tum jaante ho

kai sadiyon se hum ye kar rahe hain

baDi mehnat se KHun-e-dil jala kar

subh-o-shab nur aankhon ko pila kar

tarashe sang-e-marmar saKHt patthar

aur un se KHub-surat but banae

biTha kar mandiron mein wediyon par

unhen puja unhen sajde kiye hain

hamari rasm hai

tum jaante ho

ki khanDit ho gai hai murti jab

to hum ne taj diya

dekha na muD kar

wo tanha rah gae yug ki Dagar par

na koi bhakt na koi pujari

na koi aarti

na dhup dipak

ziyaada se ziyaada ye hua hai

'ajaib ghar ki zinat ho gae hain

hamari rasm hi chunki yahi hai

tumhaara farz hai

muhtat rahna

shikast-o-reKHt se KHud ko bachana

sanam ho gosht ke zinda

ya patthar

KHarash aai agar ruKH par badan par

to koi bhi tumhein sajda na hoga

agar salim rahe

sajde bhi honge