intishaar

kabhī jumūd kabhī sirf intishār sā hai

jahāñ ko apnī tabāhī kā intizār sā hai

manū kī machhlī na kashti-e-nūh aur ye fazā

ki qatre qatre meñ tūfān be-qarār sā hai

maiñ kis ko apne garebāñ kā chaak dikhlā.ūñ

ki aaj dāman-e-yazdāñ bhī taar taar sā hai

sajā-sañvār ke jis ko hazār naaz kiye

usī pe ḳhāliq-e-kaunain sharmsār sā hai

tamām jism hai bedār fikr ḳhvābīda

dimāġh pichhle zamāne kī yādgār sā hai

sab apne paañv pe rakh rakh ke paañv chalte haiñ

ḳhud apne dosh pe har aadmī savār sā hai

jise pukāriye miltā hai ik khañDar se javāb

jise bhī dekhiye maazī kā ishtihār sā hai

huī to kaise bayābāñ meñ aa ke shaam huī

ki jo mazār yahāñ hai mirā mazār sā hai

koī to suud chukā.e koī to zimma le

us inqalāb kā jo aaj tak udhār sā hai

kabhi jumud kabhi sirf intishaar sa hai

jahan ko apni tabahi ka intizar sa hai

manu ki machhli na kashti-e-nuh aur ye faza

ki qatre qatre mein tufan be-qarar sa hai

main kis ko apne gareban ka chaak dikhlaun

ki aaj daman-e-yazdan bhi tar tar sa hai

saja-sanwar ke jis ko hazar naz kiye

usi pe KHaliq-e-kaunain sharmsar sa hai

tamam jism hai bedar fikr KHwabida

dimagh pichhle zamane ki yaadgar sa hai

sab apne panw pe rakh rakh ke panw chalte hain

KHud apne dosh pe har aadmi sawar sa hai

jise pukariye milta hai ek khanDar se jawab

jise bhi dekhiye mazi ka ishtihaar sa hai

hui to kaise bayaban mein aa ke sham hui

ki jo mazar yahan hai mera mazar sa hai

koi to sud chukae koi to zimma le

us inqalab ka jo aaj tak udhaar sa hai