انتشار صفت

یہ ٹوٹتے ہوئے لمحے

یہ منتشر نظریں

یہ زخم زخم اجالے

یہ خوں فشاں راتیں

یہ زرد زرد سے چہرے

یہ ڈوبتی آنکھیں

یہ بجھتے شعلوں کا منظر

یہ راکھ راکھ سے گھر

یہ طاق دل پہ لرزتے ہوئے چراغ سکوں

یہ ڈال ڈال بھٹکتے ہوئے طیور فسوں

یہ جسم جسم سے اٹھتا دھواں دھواں لہجہ

مسیح وقت سے کرتا ہے التجا

لیکن

حریم لفظ سے معنی نکل چکے ہیں اب

وہ زہد زہد سویرے بدل چکے ہیں اب

سسک رہی ہے رگوں میں لہو کی سرگوشی

خود اپنے آپ سے گھبرا رہی ہے خاموشی