intizar

bazm-e-ḳhāmosh meñ chhiḌne ko hai phir sāz-e-hayāt

muntazir baiThe haiñ sab gosh-bar-āvāz-e-hayāt

qābil-e-dīd hai tūfān se pahle kā sukūñ

josh-o-hangāma-o-haijān se pahle kā sukūñ

yās-o-ummīd meñ tafrīq hai mushkil is dam

hama-tan sākit-o-mabhūt hai mahfil is dam

TikTikī bāñdhe ba-yak-taur hazāroñ āñkheñ

ik kaf-e-pīr-e-muġhāñ aur hazāroñ āñkheñ

koī āgāh nahīñ daur kidhar aa.egā

kis ke hāthoñ meñ ḳhat-e-jām nazar aa.egā

har ghaḌī sīnoñ meñ hai kashmakash-e-shakk-o-yāqīñ

majlis-e-aish meñ bhī sūrat-e-ārām nahīñ

kis ne āġhāz kiyā zamzama-e-bazm-e-tarab

lab-e-jāñ-baḳhsh kī thoḌī sī bhī jumbish hai ġhazab

muzhda-e-amn-o-amāñ sulh kā paiġhām hai kyā

jang-e-āzādī-e-insāñ kā sar-anjām hai kyā

sāz-e-ulfat kī navā soz-e-mohabbat to nahīñ

naġhma-e-adl-o-musāvāt-o-uḳhuvvat to nahīñ

matlab-e-zīst kī tafhīm meñ kyā der hai ab

ne.amat-e-ām kī taqsīm meñ kyā der hai ab

tālib-e-sāġhar-e-nau bazm-e-kuhan hai saaqī

intizār āḳhir-e-shab sabr-shikan hai saaqī

bazm-e-KHamosh mein chhiDne ko hai phir saz-e-hayat

muntazir baiThe hain sab gosh-bar-awaz-e-hayat

qabil-e-did hai tufan se pahle ka sukun

josh-o-hangama-o-haijaan se pahle ka sukun

yas-o-ummid mein tafriq hai mushkil is dam

hama-tan sakit-o-mabhut hai mahfil is dam

TikTiki bandhe ba-yak-taur hazaron aankhen

ek kaf-e-pir-e-mughan aur hazaron aankhen

koi aagah nahin daur kidhar aaega

kis ke hathon mein KHat-e-jam nazar aaega

har ghaDi sinon mein hai kashmakash-e-shakk-o-yaqin

majlis-e-aish mein bhi surat-e-aram nahin

kis ne aaghaz kiya zamzama-e-bazm-e-tarab

lab-e-jaan-baKHsh ki thoDi si bhi jumbish hai ghazab

muzhda-e-amn-o-aman sulh ka paigham hai kya

jang-e-azadi-e-insan ka sar-anjam hai kya

saz-e-ulfat ki nawa soz-e-mohabbat to nahin

naghma-e-adl-o-musawat-o-uKHuwwat to nahin

matlab-e-zist ki tafhim mein kya der hai ab

neamat-e-am ki taqsim mein kya der hai ab

talib-e-saghar-e-nau bazm-e-kuhan hai saqi

intizar aaKHir-e-shab sabr-shikan hai saqi