intizar hi intizar

ek chāñdnī raat thī

husn kī bārāt thī

thā dhartī par bhī ek chāñd chamaktā huā

sāmne us ke ek hasīn dilrubā

ḳhūbsūrat naqsh-o-nigār

āñkhoñ meñ ḳhumār hī ḳhumār

palkeñ jhuktīñ kabhī uThtīñ

lab-kushā hote

phir ḳhamoshī

raat kī dilkashī sameT kar

is chāñd kī āġhosh meñ

zam honā chāhtī thī vo

vo chāñd bhī us husn ke sahar meñ Duubā huā

dekhtā rahā dekhtā rahā

kaise dil se dil milā.e

ki āġhosh meñ vo simaT jaa.e

dhaḌkaneñ tez hotī ga.iiñ

qarār ik duuje kā khotī ga.iiñ

us chāñd ne parī-paikar kī jānib

haath baḌhā diye

apnī āġhosh ko vā kiyā aur kahā

aao simaT jaao merī bāñhoñ meñ

binā tumhāre maiñ rah nahīñ saktā jī nahīñ saktā

tum ki merā jīvan ho

vo parī-paikar husn-e-mujassam aage baḌhī

us chāñd kī dhaḌkanoñ meñ mil jaane ke liye

zindagī ke giit gaane ke liye muskurāne ke liye

achānak ġhaiz-o-ġhazab kī aa.ī āvāz

kahāñ hai chāñdnī kahāñ hai chāñdnī

vo husn-e-mujassam

ghar vāloñ kī ġhaiz-o-ġhazab kī sun kar āvāz

tharrā ga.ī kaañp ga.ī ḳhauf se

barq-raftār se sahn se hotī huī

jā kar apnī ḳhvāb-gāh meñ

maḳhmalīñ bistar par darāz ho ga.ī

phir rātoñ pahroñ vo jāgtī rahī jāgtī rahī

niiñd chain ārām kho gayā sab

rah gayā to bas ek intizār

intizār hī intizār

ek chandni raat thi

husn ki baraat thi

tha dharti par bhi ek chand chamakta hua

samne us ke ek hasin dilruba

KHubsurat naqsh-o-nigar

aankhon mein KHumar hi KHumar

palken jhuktin kabhi uThtin

lab-kusha hote

phir KHamoshi

raat ki dilkashi sameT kar

is chand ki aaghosh mein

zam hona chahti thi wo

wo chand bhi us husn ke sahar mein Duba hua

dekhta raha dekhta raha

kaise dil se dil milae

ki aaghosh mein wo simaT jae

dhaDkanen tez hoti gain

qarar ek duje ka khoti gain

us chand ne pari-paikar ki jaanib

hath baDha diye

apni aaghosh ko wa kiya aur kaha

aao simaT jao meri banhon mein

bina tumhaare main rah nahin sakta ji nahin sakta

tum ki mera jiwan ho

wo pari-paikar husn-e-mujassam aage baDhi

us chand ki dhaDkanon mein mil jaane ke liye

zindagi ke git gane ke liye muskurane ke liye

achanak ghaiz-o-ghazab ki aai aawaz

kahan hai chandni kahan hai chandni

wo husn-e-mujassam

ghar walon ki ghaiz-o-ghazab ki sun kar aawaz

tharra gai kanp gai KHauf se

barq-raftar se sahn se hoti hui

ja kar apni KHwab-gah mein

maKHmalin bistar par daraaz ho gai

phir raaton pahron wo jagti rahi jagti rahi

nind chain aaram kho gaya sab

rah gaya to bas ek intizar

intizar hi intizar