intizar

tumheñ mālūm hai vo be-ḳhudī kā kaisā aalam thā

mire hoñToñ meñ jaltī paTriyāñ bhī muskurātī thiiñ

mirī āñkhoñ ko rāteñ jāgne kā ġham nahīñ thā jab

mire hāthoñ meñ bikhrī silvaTeñ shikva na kartī thiiñ

mire pairoñ kā nangā-pan kahīñ be-dam nahīñ thā jab

mujhe khaddar ke malbūsāt bhī rusvā na karte the

kisī khāne kī baasī badbuoñ meñ ġham nahīñ thā jab

ye saarī mehnateñ kyuuñ merī āñkhoñ meñ utartī haiñ

ye hoñToñ meñ dimāġhoñ kā khiñchāo jāgtā kyuuñ hai

ye chehre kī lakīreñ kyuuñ mujhe ranjīda kartī haiñ

ye kaise rañj haiñ ālām haiñ ġham haiñ tabāhī hai

mirī ḳhud-āgahī ke sabz chashme ḳhushk se kyuuñ haiñ

ye kaisī dhuup hai jo jism kī ra.anā.ī jhulsā.e

ye kaisī chhāñv hai jo sardiyoñ kī barf ban jaa.e

ye maiñ ne chāñdnī ko muddatoñ se kyuuñ nahīñ dekhā

ye kyuuñ in bārishoñ meñ phuul rastoñ meñ nahīñ phaile

ab is mamtā kī shabnam kyuuñ mire dil par nahīñ girtī

mirī āġhosh meñ bastī ke bachche kyuuñ nahīñ aate

vahī hañgām ab kyuuñ ek pāgal-pan sā lagtā hai

kisī dilchasp ḳhāmoshī meñ kyuuñ vahshat sī hotī hai

ye āḳhir rafta rafta saarī duniyā kyuuñ badaltī hai

magar jab sochtī huuñ maiñ to ye bohrān kā aalam

ye saarī hosh kī duniyā hai bas ik ḳhvāb ke pīchhe

ye saare bolte aañsū ye hoñToñ maiñ khiñchāo sā

ye jaltī dhuup dushman chhāñv guzre chāñd kī kirneñ

ye āzurda se raste māmtā se ḳhālī āġhosheñ

ye pāgal-pan kī duniyā vahshatoñ kī ghor tārīkī

ye merī ruuh ke andar badaltī ādatoñ kā ġham

tumhārā muntazir hai tum mujhe mazbūt bāñhoñ meñ

kabhī haule se le loge mire kānoñ meñ kah doge

tumheñ kis baat kā ġham hai tumheñ kaisī pareshānī

tumhāre paas haiñ jo huuñ tumhāre ġham maiñ le lūñgā

tumhein malum hai wo be-KHudi ka kaisa aalam tha

mere honTon mein jalti paTriyan bhi muskuraati thin

meri aankhon ko raaten jagne ka gham nahin tha jab

mere hathon mein bikhri silwaTen shikwa na karti thin

mere pairon ka nanga-pan kahin be-dam nahin tha jab

mujhe khaddar ke malbusat bhi ruswa na karte the

kisi khane ki basi badbuon mein gham nahin tha jab

ye sari mehnaten kyun meri aankhon mein utarti hain

ye honTon mein dimaghon ka khinchao jagta kyun hai

ye chehre ki lakiren kyun mujhe ranjida karti hain

ye kaise ranj hain aalam hain gham hain tabahi hai

meri KHud-agahi ke sabz chashme KHushk se kyun hain

ye kaisi dhup hai jo jism ki ranai jhulsae

ye kaisi chhanw hai jo sardiyon ki barf ban jae

ye main ne chandni ko muddaton se kyun nahin dekha

ye kyun in barishon mein phul raston mein nahin phaile

ab is mamta ki shabnam kyun mere dil par nahin girti

meri aaghosh mein basti ke bachche kyun nahin aate

wahi hangam ab kyun ek pagal-pan sa lagta hai

kisi dilchasp KHamoshi mein kyun wahshat si hoti hai

ye aaKHir rafta rafta sari duniya kyun badalti hai

magar jab sochti hun main to ye bohran ka aalam

ye sari hosh ki duniya hai bas ek KHwab ke pichhe

ye sare bolte aansu ye honTon main khinchao sa

ye jalti dhup dushman chhanw guzre chand ki kirnen

ye aazurda se raste mamta se KHali aaghoshen

ye pagal-pan ki duniya wahshaton ki ghor tariki

ye meri ruh ke andar badalti aadaton ka gham

tumhaara muntazir hai tum mujhe mazbut banhon mein

kabhi haule se le loge mere kanon mein kah doge

tumhein kis baat ka gham hai tumhein kaisi pareshani

tumhaare pas hain jo hun tumhaare gham main le lunga