intizar

terī hī justujū mujhe terā hī intizār hai

tujh se bichhaḌ ke ai sanam chain hai na qarār hai

terī sadā.eñ kaan meñ guuñj rahī haiñ baar baar

sāz-e-hayāt kā mire chheḌā hai tū ne taar taar

kitne hī din guzar ga.e aa.e hazāroñ inqalāb

āñkheñ taras ke rah ga.iiñ TuuT ga.e hasīn ḳhvāb

bāġh-e-shabāb meñ mire aa ke ga.ī bahār bhī

phuul khile bikhar ga.e ruḳhsat huā qarār bhī

kaagā ke kaa.eñ kaa.eñ se dil ko to aas bhī huī

pī jo kahā papīhe ne dil kī mire ḳhalish baḌhī

jūñ-hī kisī ne dī sadā dauḌ ke sū-e-dar gayā

dhak se huā hai dil mirā jab bhī koī Thahar gayā

diiñ jo kisī ne thapkiyāñ mere dar-o-dīvār meñ

tūfāñ sā uTh ke rah gayā bāda-e-intizār meñ

terī hī yaad meñ sanam dil kā ye hāl-e-zār hai

tere hī hijr meñ mujhe jiinā bhī nāgavār hai

ḳhāna-ḳharāb ho ke maiñ ḳhuub hī dar-ba-dar huā

musht-e-ġhubār bhī banā zarra-e-rahguzar huā

ashk bhī ḳhushk ho chuke bujh bhī chukī nazar kī pyaas

sab to huā magar kabhī puurī huī na merī aas

terī talāsh chār-sū mujh ko to sub.h-o-shām hai

rātoñ kī niiñd terī hī yādoñ se ab harām hai

ab maiñ karūñ to kyā karūñ koī mujhe batā.e to

kis se kahūñ kidhar phirūñ jā.ūñ kahāñ batā.e to

ab bhī vahī junūn hai ab bhī vahī ḳhumār hai

pahle bhī intizār thā aaj bhī intizār hai

teri hi justuju mujhe tera hi intizar hai

tujh se bichhaD ke ai sanam chain hai na qarar hai

teri sadaen kan mein gunj rahi hain bar bar

saz-e-hayat ka mere chheDa hai tu ne tar tar

kitne hi din guzar gae aae hazaron inqalab

aankhen taras ke rah gain TuT gae hasin KHwab

bagh-e-shabab mein mere aa ke gai bahaar bhi

phul khile bikhar gae ruKHsat hua qarar bhi

kaga ke kaen kaen se dil ko to aas bhi hui

pi jo kaha papihe ne dil ki mere KHalish baDhi

jun-hi kisi ne di sada dauD ke su-e-dar gaya

dhak se hua hai dil mera jab bhi koi Thahar gaya

din jo kisi ne thapkiyan mere dar-o-diwar mein

tufan sa uTh ke rah gaya baada-e-intizar mein

teri hi yaad mein sanam dil ka ye haal-e-zar hai

tere hi hijr mein mujhe jina bhi nagawar hai

KHana-KHarab ho ke main KHub hi dar-ba-dar hua

musht-e-ghubar bhi bana zarra-e-rahguzar hua

ashk bhi KHushk ho chuke bujh bhi chuki nazar ki pyas

sab to hua magar kabhi puri hui na meri aas

teri talash chaar-su mujh ko to subh-o-sham hai

raaton ki nind teri hi yaadon se ab haram hai

ab main karun to kya karun koi mujhe batae to

kis se kahun kidhar phirun jaun kahan batae to

ab bhi wahi junun hai ab bhi wahi KHumar hai

pahle bhi intizar tha aaj bhi intizar hai