انتظار

زندگی لمحۂ موجود میں لپٹی ہوئی اک سانس سے بوجھل ہے بہت

موت اس لمحۂ لا فانی و دائم کے گزر جانے کی امید میں

اس پار

کھڑی ہے کب سے

کائنات اپنے شب و روز کی گردش سے حراساں بیزار

منتظر ایک صدائے کن کی

ایسی ساعت کی جہاں

ہست و بود اور وجود اور عدم کا یہ تماشا مٹ جائے

ذات میں میری

اسی گردش روز و شب کا

ایک بے چین حراساں لمحہ

سوچتا رہتا ہے وہ عرش مکیں

جانے کیا سوچ کے خاموش ہے

کچھ بولے بھی

کن فیکوں کا تماشا جو بہت پہلے کبھی جاری ہوا تھا انجمؔ

اس کے انجام کا اعلان اب

ہو جائے بھی