irada

kal yahāñ se maiñ kahīñ duur chalā jā.ūñgā

tirī ma.asūm nigāhoñ se tirī mahfil se

raqs kartī huī duniyā se tirī manzil se

duur haañ duur tire naġhma-e-sāz-e-dil se

rūh-e-nasrīn-o-saman aur bhī ġhamgīn na ho

kal yahāñ se maiñ kahīñ duur chalā jā.ūñgā

maiñ huuñ nādār to nādār kī ġham-ḳhvār na ban

ek sham.a-e-tah-e-dāman kī talabgār na ban

tujh ko hañste hue gaate hue lamhoñ kī qasam

dekh kar merī taraf aur gunahgār na ban

mere so.e hue ehsās ko bedār na kar

kal yahāñ se maiñ kahīñ duur chalā jā.ūñgā

dil tirī yaad se ābād hai nāshād sahī

saaz naġhmoñ se jo ḳhālī hai to fariyād sahī

terī duniyā rahe ābād maiñ barbād sahī

tere milne kā tasavvur na sahī yaad sahī

ek nāshād ko ab aur bhī nāshād na kar

kal yahāñ se maiñ kahīñ duur chalā jā.ūñgā

bazm gul-hā-e-mohabbat se sajānā hai tujhe

sīm-o-zar kī na.ī duniyā ko basānā hai tujhe

ghar ke hañste hue tūfān se jaanā hai tujhe

ziist ke saaz par har rang meñ gaanā hai tujhe

is liye bār-e-ġham-e-dosh se ranjūr na ho

kal yahāñ se maiñ kahīñ duur chalā jā.ūñgā

kal yahan se main kahin dur chala jaunga

teri masum nigahon se teri mahfil se

raqs karti hui duniya se teri manzil se

dur han dur tere naghma-e-saz-e-dil se

ruh-e-nasrin-o-saman aur bhi ghamgin na ho

kal yahan se main kahin dur chala jaunga

main hun nadar to nadar ki gham-KHwar na ban

ek shama-e-tah-e-daman ki talabgar na ban

tujh ko hanste hue gate hue lamhon ki qasam

dekh kar meri taraf aur gunahgar na ban

mere soe hue ehsas ko bedar na kar

kal yahan se main kahin dur chala jaunga

dil teri yaad se aabaad hai nashad sahi

saz naghmon se jo KHali hai to fariyaad sahi

teri duniya rahe aabaad main barbaad sahi

tere milne ka tasawwur na sahi yaad sahi

ek nashad ko ab aur bhi nashad na kar

kal yahan se main kahin dur chala jaunga

bazm gul-ha-e-mohabbat se sajaana hai tujhe

sim-o-zar ki nai duniya ko basana hai tujhe

ghar ke hanste hue tufan se jaana hai tujhe

zist ke saz par har rang mein gana hai tujhe

is liye bar-e-gham-e-dosh se ranjur na ho

kal yahan se main kahin dur chala jaunga