irfan

in ko sajda karo

ye haiñ ḳhāqān-e-vaqt

in ke qadmoñ pe jhukte haiñ shāhoñ ke sar

in ke dar par rahā karte haiñ hājibān-e-kirām

in kī ḳhalvat kī zīnat kanīzān-e-sīmīñ-badan

in ko sajda karo

naam kā in ke kalima paḌho

pīr-o-murshid haiñ ye

ye haiñ mushkil-kushā

shāh-o-darvesh sab in ke haiñ zalla-ḳhvār

in ke lab par hai qur.ān dil meñ ḳhudā

in ke paañv pe ḳham hai sar-e-ittiqā

hūr-o-ġhilmāñ haiñ in ke ġhulām

in ko sajda karo

naam kā in ke kalima paḌho

ye siyāsat ke ik mard-e-maidān haiñ

ḳhāk-e-pā in kī hai surma-e-chashm-e-ahl-e-ḳhirad

qibla-e-ahl-e-hājat haiñ ye

in se qaa.em bharam qaum kā

sarzamīñ mulk kī in se hai rashk-e-arsh-e-barīñ

Thokaroñ meñ haiñ in kī vazīr-o-amīr

in ko sajda karo

naam kā in ke kalima paḌho

nafs-e-sarkash mirā

roz suntā rahā

sar bhī dhuntā rahā

ḳham na lekin huā

merā sar

dar pe ḳhāqān ke

murshid-e-vaqt ke paañv par

qibla-e-ahl-e-hājat kī chaukhaT pe bhī

aur phir yuuñ huā

merā sar

ho gayā

apne aage hī ḳham

in ko sajda karo

ye hain KHaqan-e-waqt

in ke qadmon pe jhukte hain shahon ke sar

in ke dar par raha karte hain hajiban-e-kiram

in ki KHalwat ki zinat kanizan-e-simin-badan

in ko sajda karo

nam ka in ke kalima paDho

pir-o-murshid hain ye

ye hain mushkil-kusha

shah-o-darwesh sab in ke hain zalla-KHwar

in ke lab par hai quran dil mein KHuda

in ke panw pe KHam hai sar-e-ittiqa

hur-o-ghilman hain in ke ghulam

in ko sajda karo

nam ka in ke kalima paDho

ye siyasat ke ek mard-e-maidan hain

KHak-e-pa in ki hai surma-e-chashm-e-ahl-e-KHirad

qibla-e-ahl-e-hajat hain ye

in se qaem bharam qaum ka

sarzamin mulk ki in se hai rashk-e-arsh-e-barin

Thokaron mein hain in ki wazir-o-amir

in ko sajda karo

nam ka in ke kalima paDho

nafs-e-sarkash mera

roz sunta raha

sar bhi dhunta raha

KHam na lekin hua

mera sar

dar pe KHaqan ke

murshid-e-waqt ke panw par

qibla-e-ahl-e-hajat ki chaukhaT pe bhi

aur phir yun hua

mera sar

ho gaya

apne aage hi KHam