irfan KHan ke liye

tum

ham donoñ kī mushtarka mohabbat the

lekin bichhaḌne ke liye

tum ne aise mausam kā intiḳhāb kiyā

jab tanhā.ī

jismoñ meñ

ġhaar banā.e baiThī thī

āsmān parindoñ se ḳhālī thā

aur aañsū tak ḳhushk ho chuke the

is bad-numā sub.h kā

zā.iqa abhī tak

mere taalū se chimTā hai

jab tumhārī maut kī ḳhabar ne

dil ko aisī udāsī se bhar diyā thā

jise jhelne ke liye

ek vajūd thoḌā paḌ jaatā hai

tab maiñ ne pahlī baar

use gale lagāne kā sochā thā

jo ab kahīñ bhī nahīñ hai

shāyad

mushtarka mohabbateñ bhī

kuchh logoñ ko rokne ke liye

kaafī nahīñ hotīñ

tum

hum donon ki mushtarka mohabbat the

lekin bichhaDne ke liye

tum ne aise mausam ka intiKHab kiya

jab tanhai

jismon mein

ghaar banae baiThi thi

aasman parindon se KHali tha

aur aansu tak KHushk ho chuke the

is bad-numa subh ka

zaiqa abhi tak

mere talu se chimTa hai

jab tumhaari maut ki KHabar ne

dil ko aisi udasi se bhar diya tha

jise jhelne ke liye

ek wajud thoDa paD jata hai

tab main ne pahli bar

use gale lagane ka socha tha

jo ab kahin bhi nahin hai

shayad

mushtarka mohabbaten bhi

kuchh logon ko rokne ke liye

kafi nahin hotin