irtiqa

ye kā.enāt yakāyak vo ḳhalq kar detā

to chhe dinoñ meñ ise us ne phir banāyā kyoñ

use ḳhabar thī ki aadam kī kyā jibillat hai

to phir bahisht meñ aadam ko āzmāyā kyoñ

payām us kā koī ik nabī bhī de detā

phir us ne lākhoñ rasūloñ se kahlvāyā kyoñ

vo ek shab meñ bhī qur.āñ utaar saktā thā

vah.y kā silsila barsoñ talak chalāyā kyoñ

vo tifl ek ishāre se ḳhalq kar detā

to maañ ke peT meñ nau maah tak chhupāyā kyoñ

vo ek lamhe meñ har sub.h ko janam detā

to dhīre dhīre se sūraj ko phir jagāyā kyoñ

har ek fasl vo jhaT-paT javān kar detā

anaaj dhuup meñ 'arse talak pakāyā kyoñ

vo paidā karte hī 'vāsif' mujhe navā detā

yuuñ biis saal meñ shā'ir mujhe banāyā kyoñ

ye saarā dahr agar irtiqā kā qaa.il hai

to is liye ki ḳhudā irtiqā pe maa.il hai

ye kaenat yakayak wo KHalq kar deta

to chhe dinon mein ise us ne phir banaya kyon

use KHabar thi ki aadam ki kya jibillat hai

to phir bahisht mein aadam ko aazmaya kyon

payam us ka koi ek nabi bhi de deta

phir us ne lakhon rasulon se kahlwaya kyon

wo ek shab mein bhi quran utar sakta tha

wahy ka silsila barson talak chalaya kyon

wo tifl ek ishaare se KHalq kar deta

to man ke peT mein nau mah tak chhupaya kyon

wo ek lamhe mein har subh ko janam deta

to dhire dhire se suraj ko phir jagaya kyon

har ek fasl wo jhaT-paT jawan kar deta

anaj dhup mein 'arse talak pakaya kyon

wo paida karte hi 'wasif' mujhe nawa deta

yun bis sal mein sha'ir mujhe banaya kyon

ye sara dahr agar irtiqa ka qail hai

to is liye ki KHuda irtiqa pe mail hai