isbaat

vo ek lamha ki

lam-yazal ne azal kī ḳhush-baḳht sā.atoñ kā ḳhamīr le kar

hamāre ḳhuuñ kī rutūbatoñ meñ bhigo ke

ik munhanī se paikar meñ Dhaal kar

dhīre dhīre

āzmā.ish ke marhaloñ se guzār kar

jis ko dam kiyā thā

vo ek lamha ki tarah jis ki

samundaroñ kī rivāyatoñ se

havāoñ kī sansanāhaToñ kī hikāyatoñ se

ḳhalīq miTTī kī soñdhī soñdhī amānatoñ se

jhulaste sūraj kī barguzīda tamāzatoñ se

amal meñ aa.ī vo ek lamha ki

sab avāmil asiir kar ke

zamāñ kī yak-rañg sarhadoñ ko phalāñg kar jab

makāñ kī pechīda vus.atoñ par raqam huā thā

amiiñ hai sachchī ibādatoñ kā

hamāre māthe pe jo likhe haiñ

halīf hai saarī azmatoñ kā sadāqatoñ kā

hamāre ḳhuuñ meñ jo rach ga.ī haiñ

harīf hai sab kudūratoñ kaa, adāvatoñ kaa, sa.ūbatoñ kā

hamārī banjar zamīñ ke siine se jo ugī haiñ

aziim markaz hai nā-shunīda ināyatoñ kaa, mohabbatoñ kaa, rifāqatoñ kaa, muravvatoñ kā

hamārī rūhoñ meñ jo basī haiñ

ham apne ḳhāliq kī kaun sī nematoñ se inkār kar sakeñge

ki sajda-gāh-e-yaqīñ se

phūTī huī kiran meñ asiir haiñ ham

bulandiyoñ ke safīr haiñ ham

guzishta sadiyoñ ke mojazoñ kī nazīr haiñ ham

aziim dānish ko ham ne

harf o navā kī rañgīñ ridā atā kī

zarūratoñ kī qabā atā kī

vo ek lamha ki

aarzū meñ azal se jis kī

haqīqatoñ kī

jhulastī dahlīz pe

ham ne tum ne

mubāsharat ke tamām aasan hī āzmā.e

agar hamāre diloñ meñ dīvār-e-jāñ uThā.e

magar ye mumkin hī kis tarah hai ki

ham mohabbat ke biij bo kar adāvatoñ ke shajar ugā.eñ

jo ek lamha ham

apne ḳhāliq ke naam mansūb kar chuke haiñ

vo ek lamha agar na aa.e

magar ye imkāñ kī sarhadoñ se gurez hogā

gurez jo āsmāñ se utre

kisī sahīfe kī vā-jbīñ par

raqam nahīñ hai

ham apne ḳhāliq kī kaun sī nematoñ se inkār kar sakeñge

wo ek lamha ki

lam-yazal ne azal ki KHush-baKHt saaton ka KHamir le kar

hamare KHun ki rutubaton mein bhigo ke

ek munhani se paikar mein Dhaal kar

dhire dhire

aazmaish ke marhalon se guzar kar

jis ko dam kiya tha

wo ek lamha ki tarah jis ki

samundaron ki riwayaton se

hawaon ki sansanahaTon ki hikayaton se

KHaliq miTTi ki sondhi sondhi amanaton se

jhulaste suraj ki barguzida tamazaton se

amal mein aai wo ek lamha ki

sab awamil asir kar ke

zaman ki yak-rang sarhadon ko phalang kar jab

makan ki pechida wusaton par raqam hua tha

amin hai sachchi ibaadaton ka

hamare mathe pe jo likhe hain

halif hai sari azmaton ka sadaqaton ka

hamare KHun mein jo rach gai hain

harif hai sab kuduraton ka, adawaton ka, saubaton ka

hamari banjar zamin ke sine se jo ugi hain

azim markaz hai na-shunida inayaton ka, mohabbaton ka, rifaqaton ka, murawwaton ka

hamari ruhon mein jo basi hain

hum apne KHaliq ki kaun si nematon se inkar kar sakenge

ki sajda-gah-e-yaqin se

phuTi hui kiran mein asir hain hum

bulandiyon ke safir hain hum

guzishta sadiyon ke mojazon ki nazir hain hum

azim danish ko hum ne

harf o nawa ki rangin rida ata ki

zaruraton ki qaba ata ki

wo ek lamha ki

aarzu mein azal se jis ki

haqiqaton ki

jhulasti dahliz pe

hum ne tum ne

mubasharat ke tamam aasan hi aazmae

agar hamare dilon mein diwar-e-jaan uThae

magar ye mumkin hi kis tarah hai ki

hum mohabbat ke bij bo kar adawaton ke shajar ugaen

jo ek lamha hum

apne KHaliq ke nam mansub kar chuke hain

wo ek lamha agar na aae

magar ye imkan ki sarhadon se gurez hoga

gurez jo aasman se utre

kisi sahife ki wa-jbin par

raqam nahin hai

hum apne KHaliq ki kaun si nematon se inkar kar sakenge