ishq-e-na-tamam

kaun kahtā hai ham tum judā ho ga.e

zindagī se achānak ḳhafā ho ga.e

hijr-e-ālam pe chhāyā thā kuchh is tarah

vasl ke ḳhvāb vaqf-e-duā ho ga.e

vaqt-e-mīzān meñ jaane kyā baat thī

tiir jo be-ḳhatā the ḳhatā ho ga.e

ham ki jis but ko be-jān samjhā kiye

vo zamāne meñ kyuuñ devtā ho ga.e

ek din yuuñ huā husn-e-sarkār meñ

mudda.ī jo na the mudda.ā ho ga.e

kuchh irāde bhī the kuchh tamāshe bhī the

raqs ke aks bhī māvarā ho ga.e

dekhte dekhte ham fanā the magar

dekhte dekhte tum ḳhudā ho ga.e

kaun kahta hai hum tum juda ho gae

zindagi se achanak KHafa ho gae

hijr-e-alam pe chhaya tha kuchh is tarah

wasl ke KHwab waqf-e-dua ho gae

waqt-e-mizan mein jaane kya baat thi

tir jo be-KHata the KHata ho gae

hum ki jis but ko be-jaan samjha kiye

wo zamane mein kyun dewta ho gae

ek din yun hua husn-e-sarkar mein

muddai jo na the muddaa ho gae

kuchh irade bhi the kuchh tamashe bhi the

raqs ke aks bhi mawara ho gae

dekhte dekhte hum fana the magar

dekhte dekhte tum KHuda ho gae