ishq

maiñ tirī khoj meñ

sahrā sahrā bhaTaktī rahī muddatoñ

nange paañv meñ phūTe hue aable jab sisakne lage

hoñT paanī kī ḳhātir bilakne lage

ḳhushk hoñToñ pe apnī zabāñ pherte

āsmāñ kī taraf aañkh dauḌā.ī to

aañkh se chand aañsū Tapak kar mere

kaan ko Dhāñpte mere bāloñ kī sūkhī laToñ ko bhigote hue kaan meñ jā gire

chīḳhte chīḳhte jab galā phāḌte

merī āvāz bhī baiTh jaane laggī

tujh ko āvāz de kar pukārā bahut

merī apnī sadā kuchh pahāḌoñ se Takrā ke apne hī kānoñ meñ lauT aa.ī to

phir mujhe yuuñ lagā

merī har ik sadā ab tire kaan ko chīrne se to qāsir rahegī sadā

mujh ko tū na milā

gard ālūd bikhre hue baal āñchal se Dhāñpe hue

maiñ ḳhudā ke jo sajde meñ phir gir paḌī

chīḳhtī hī rahī

chīḳhtī hī rahī

chīḳhtī hī rahī

mujh ko tū to milā hī nahīñ haañ magar

phir kuchh aisā huā

mere ashkoñ ne sahrā kī taptī huī ret kī pyaas ko jab bujhāyā to phir us samay

ek jhoñkā sā chanchal sī ḳhushbū liye mere atrāf meñ khil gayā

tū milā ki nahīñ par ḳhudā mil gayā

main teri khoj mein

sahra sahra bhaTakti rahi muddaton

nange panw mein phuTe hue aable jab sisakne lage

honT pani ki KHatir bilakne lage

KHushk honTon pe apni zaban pherte

aasman ki taraf aankh dauDai to

aankh se chand aansu Tapak kar mere

kan ko Dhanpte mere baalon ki sukhi laTon ko bhigote hue kan mein ja gire

chiKHte chiKHte jab gala phaDte

meri aawaz bhi baiTh jaane laggi

tujh ko aawaz de kar pukara bahut

meri apni sada kuchh pahaDon se Takra ke apne hi kanon mein lauT aai to

phir mujhe yun laga

meri har ek sada ab tere kan ko chirne se to qasir rahegi sada

mujh ko tu na mila

gard aalud bikhre hue baal aanchal se Dhanpe hue

main KHuda ke jo sajde mein phir gir paDi

chiKHti hi rahi

chiKHti hi rahi

chiKHti hi rahi

mujh ko tu to mila hi nahin han magar

phir kuchh aisa hua

mere ashkon ne sahra ki tapti hui ret ki pyas ko jab bujhaya to phir us samay

ek jhonka sa chanchal si KHushbu liye mere atraf mein khil gaya

tu mila ki nahin par KHuda mil gaya